Las palavras de arriva las tomi del artikolo “ Jewish Shanghai” del Sr. Robert Case. Puedo de vez en kuando relatar pasajes de este teksto, djuntos kon syertas informasyones personal. Para la proksima revista de D.Y.D (Dostluk Yurdu Derneği) penso azer un artikolo tratando de “Los Djudios de China en la Historia”... Myentres mis bushkidades arivi a informasyones enteresantes relasyonadas kon la 2. Gerra Mundial.
Los Sefaradis ampesaron a arivar a Shanghai (tambyen i Kaifeng) verso la mitad del 19.Siglo... El empesijo de la Sigunda Gerra Mundial, miles de Djudios Ashkenazis fuyendo de Evropa vinyeron a Shanghai, la sola sivdad no demandando visa, garansiya, o algun dokumento de identidad. Entre los ke estavan fuyendo del “Holokosto”, se topava i el padre de Ehud Olmert, aktual Primo Ministro Israelyano.. Los Kinezos akseptaron estos Djudios...
El presipyo de los 40, la Komunidad Djudia de Shanghai se desvelopo asta devenir la mas grande Komunidad Djudia del Oriente Leshano (Uzak Doğu). Kontava mas de 30.000. Teniyan sus eskolas, Ospital, Simeteryo, Klup, Restorante “Kosher” i sus Gazeta. Este “Getto Evropeo” fue konosido komo “Distrikto Hongkew.”
Myentres su invazyon de Shanghai, la Armada Japoneza estableso una sorte de getto dezinyado kon el nombre de sentro para los “Refujyados sin Nasyonalidad.” De esto, estamos kokluendo ke los Japonezos, aliados de la Alemania Nazi, estavan konsiderando los imigrantes Djudios venidos de Evropa, komo no posedando dinguna suditansa (vatansız). Alora estos Djudios eran ovligados de pasar a lo menos un mez en el sovredicho sentro. Komo lo prechizi en el empesijo de este artikolo, aviya Sefaradis instalados en la sivdad, de muncho mas antes. Por lo mas eran rikos venidos de Irak, espesyalmente de Baghdad. Estos grupos no fueron sometidos a las reglas severas de la Armada Japoneza.
Diversos manaderos afirman ke ay prevas atestando la prezensya de Djudios en Shanghai, ansi ke otras sivdades de China desde munchos siglos. İnvestigasyones mostran ke probavlemente estos Djudios vinyeron via İran o İndia... En China no egzistyo alguna forma de diskriminasyon. El konsepto “Antisemitismo” es (o fue) deskonosido. “Malgrado la okupasyon del Japon, Kinezos i Djudios de Shanghai bivyeron syempre en paz. Se ayudaron resiprokamente, i estableseron una amistad bastante profunda.” (opinyon personal del Sr. Case). El esta dando tambyen syertos detalyos administrativos de la epoka de Carter, Kennedy, Johnson komo prezidentes, i del Ambasador reprezentado los Estados Unidos en Shanghai. Detalyos ke no tengo lugar de transferar...
En 1907 los Djudios fraguaron la Sinagoga “Ohel Moishe”. Aktualmente , la fragua es la unika ke kontinua sus fonksyones, djuntos el sitio abrigando la “Sinagoga”, ande el governo Kinezo fondyo el “Jewish Refugee Memorial Hall of Shanghai”. En este sitio se estan ekspozando fotos amostrando la vida de los Djudios de Shanghai, antes la invazyon Japoneza. Es impresyonante de ver oy las fotos i los dokumentos mostrando komo los refujyados se pudyeron organizar en Shanghai.
En la sigunda importante fragua relijyoza, “Ohel Rachel Sinagogue” uvo syertos lavoros de reparasyon i renovasyon. “Esta Sinagoga renomada fue fraguada en 1927 por Sir Jacob Sasoon, en memorya de su espoza Rachel. El Sr. Sasoon, un Sefaradi, fondyo tambyen el “Star Ferry Line” de Hong Kong” (notisya del Sr. Case). Se puede sitar tambyen munchas ovras realizadas en Shanghai por Djudios de Baghdad, entre otros los Srs. Elly Kadoorie i su ijo Horace Kadoorie...
Vo terminar kon la fraza final Sr. Case: “El governo kinezo esta kontente de rekonoser el rolo ke djugaron los kinezos de Shanghai en salvando la vida de miles de Djudios myentres la Sigunda Gerra Mundial...”
