Dora NİYEGOEl prezidente de Israel, Shimon Peres vino a Ankara, la kapital de la Turkiya, diya de Alhad, el onze del mez November, para realizar una vijita ofisial a la Turkiya. Lunes demanyana, Peres fue resivido por el prezidente de la Turkiya, Abdullah Gul, kon una seremonia ofisial. Mahmud Abbas, el lider de PLO, i Shimon Peres, por la primera vez se toparon endjuntos en el mezmo parlamento i dirijaron la palavra al konsilio jeneral de la Grande Asamblea de la Turkiya (TBMM).
Klara PERAHYA
Un muevo livro sovre la vida en los kampos de la muerte vyene de ser publikado en Fransya debasho el titulo:
“Le Camp Juif de Royallieu- Compiegne 1941- 1943
Collection Témoignage de la Shoah
Introduksyon de Serge Klarsfeld, sigida de los ultimos testimonyos de syete de los sovrebivyentes de este inolvidable drama de la Konsensya Umana:
Saül Castro, Roger Gompel,
Henri- Jacob Rick, Georges Kohn,
Robert- Lazare Rousso, (muestro konsivdadino)
Adam Rutkowski, Georges Wellers.
Aunke mos parese ke todo ya fue dicho, kale syempre avlar, syempre repetar, syempre revenir sovre el sujeto, afin ke mas nunka no se repete.
La trajedia de la Shoa no se akavo en 1944/45 kon la liberasyon de los kampos de la muerte, eya kontinuo ainda munchos anyos despues, kon el dolorozo ovligo de kayarsen ande se toparon enserrados munchos de los supervivyentes, konfrontados esta vez a la inkredulidad i mizmo envezes a la indiferensya de los ke no bivyeron el drama en sus karnes.
Despues la fin de la gerra, en la alegria jeneral de la Paz afirmada, pokos fueron, mizmo entre sus propyos ermanos djudyos, los ke akseptaron de oirlos... i portanto teniamos todos, tenemos ainda tantas kozas a ambezarmos de eyos.
Devemos akseptar ke ninguno es limitado a su solo ego, ke todo lo ke afita sovre tyerra kontyene una posibilidad de reperkusyon serkana o leshana sovre kada uno de mozotros... ke ainda ombres i mujeres son viktimas de aktos de salvajeria i ke ainda ninyos mueren de ambre si no en la indiferensya total, en todo kavzo en el espanto de una intervensyon ke puedra kavzar un kualkyer danyo ekonomiko.
Durante una chika entrevista organizada sovre la Shoa por uno de los prezentadores de la televizyon Franseza “Jean- Pierre Elkabash”, Simone Veil eya mizma mirakulozamente liberada de los kampos de la muerte, mos konto el drama kuando los detenidos entendyeron ke no avia kaji ninguna posivilidad de salvasyon... entonses uvo un solo dezeo, una sola obsesyon: “Ke a lo manko uno de entre eyos salve afin ke pueda kontar, ke pueda testigar.
Eyos konosyeron la sufriensa de la sed, del frio, de la ambre, no solo en sus esprito, ma en sus puerpo... eyos konosyeron un universo de oskuridad sin la mas chika esperansa de ver de muevo la luz.
“No avlar de la shoa”, “No komemorar el triste rekordo de esta desgrasya” es para mozotros Djudyos, trahisar la memorya de muestros propyos ermanos.
