Shimon Peres: ‘Vine a la Turkiya para adelantar la pas en el Medio Oriente`

Noche de lunes, en el pranso ke el Prezidente de la Turkiya dyo a la onor de Peres, Gul avlo de los esfuersos de Peres para progresar las relasiones entre los dos paizes. ‘Peres nunka protejo (esirgemek) su sostenyo (destek) en los problemas enternasyonal de la Turkiya. Israel tiene el derecho de bivir kon seguridad ariento de sus proprio frontieras. Las relasiones entre Turkiya i Israel se apoya en la konfiensa resiproka de los dos paizes. La amistad radikal entre muestros paizes konstitua la baza de muestras relasiones’.
Peres se adreso a los parlamenterios en diziendo:’Esto aki, para adelantar la pas en el Medio Oriente’. Este deskorso es muy sinyifikativo porke es la primera ves ke un lider Israeliano dyo un deskorso en el Parlamento de la Turkiya. ‘Esto aki para egzaminar las oportunidades por la pas en la rejion entera, de Siria fin Yemen’.
Felisitando Ankara de su parte por la konferensia de pas de Annapolis ke se va realizar a la fin de November, Peres kontinuo en diziendo: ‘Esta es una oportunidad historika ke no deve de eskaparse kon malogro (basarisizlik)’. Peres kompleto su deskorso kon la poema ‘Memleket Isterim’ (Kero Pais) del poet Turko Cahit Sitki Taranci.
Komo los dos paizes, Israel i la Turkiya, sufren de problemas komunes de terror, las dos partes avlaron de las prekosiones kontra la terror.
El segundo diya de su viaje, Peres vizito Estambol i fue akompanyado a su avion por el ministro de defensia de la Turkiya.
Duspues ke abasho del avion en Estambol, Shimon Peres se fue direktamente a la Sinagoga Neve Shalom. Komo lo savemos todos, esta Sinagoga sufrio de dos atakas terroristas ande mas de kuarenta judios perieron la vida. Peres fue resivido en la Sinagoga por sienes de miembros de la komunidad judia. El fue resivido kon muncha amistad i emosion. Todos los ombres vistiyan takkas kon las bandieras de la Turkiya i la bandiera de Israel enriva. Peres le prezento al Prezidente de la komunidad el regalo, el Shofar ke trusho de Israel.
El Grande Rabino, Izak Haleva, se adreso al Prezidente en Ebreo.’Vos esto dizyendo ‘Bienvenida’ en mi nombre i en el nombre de mi komunidad. Siendo una persona ke meresio el Premio de Nobel, todos savemos ke tenesh la fuersa de sostener la unidad en Israel i de enfluensar el puevlo por mirar remedios de aserkarvos a los vizinos. Dizeremos todos endjuntos ‘Amen’ por ke la pas domine en el mundo entero.
El Prezidente de la Komunidad Judia de Estambol tomo la palavra: ‘Tuvimos muncha onor de resivirvos en esta Sinagoga nombrada komo ‘Oasis (vaha) de Pas’. El nombre Shimon Peres mos traye al tino ‘esfuersos de pas’. Vuestra egzistensia i vuestros esfuersos estan pujando la esperansa de pas. Rogaremos ke vuestros esfuersos kon la kontribusion de los dirijentes de la Republika Turka traygan la pas a la rejion entera’.
Shimon Peres dirijo la palavra a los miembros de la komunidad judia. Peres avlo de las relasiones entre Israel i la Turkiya i de la emportansia de la unitad entre los dos paizes. Peres ksprimo la emosion ke esta sintiendo en dando un deskorso en una Sinagoga ke sufrio de dos atakas terroristas. Duspues, Shimon Peres avlo del rolo ke la Turkiya esta djugando en  penando por ke ayga pas. ‘El mas emportante rolo ke la Turkiya va djugar es de ekstender la pas en el Medio Oriente. Yo esto dando muncha emportansia a su aproksimasion (yaklasim). La Turkiya kere ke ayga pas en el kampo politiko i tambien en el kampo ekonomiko. Los ombres de negosios Turkos vana konstruir una rejion industrial en el West Bank. En la mezma rejion, la Universidad Turka, Bilkent va establesir una universidad i un opital. Estos establisemientos vana prokurar muevos echos para el puevlo de aya’.
‘Fin oy, Israel,  nunka tuvo menester del ayudo de los soldados de otros paizes, para gerreyar o para defender su payis. Ma para azer pas, tenemos menester del ayudo de los otros paizes. Oy, para puedermos defender, kale ke mos developemos del anglo entelektual. Solo en esta manera, vamos a pueder prometer un futuro mas klaro a muestras kreaturas’.