Anjel Pulido Ferdinandez, mediko i lider politiko de Espanya, se aserko de los Bedjeranos, i ansi, empeso el kurso de amor entre los Sefaradis i Espanya. Akel diya ke Pulido konosyo este kuplo, empeso su bushkida de pas entre los dos puevlos. Pulido keriya reparar el yerro ke sus kompatriotos aviyan echo en arondjando los Sefaradis, i el keriya mijorar las relasiones entre los Espanyoles i los Sefaradis. Ma malorozamente, el fue akuzado de tener sangre judia en sus venas.
Pulido empeso esta bushkida en el anyo 1904, kon su livro "Los Israelitos Espanyoles y el Idioma Castellano" i kon su sigundo livro "Espanyoles sin Patria y la Raza Sefaradi".
Pulido, en mezmo tiempo, se penso ke si azen pas kon los Sefaradis ke estavan dispersados en el mundo entero, eyos ivan a defender los enteresos de Espanya. En el empesijo del venten siglo, los Espanyoles aviyan sufrido muncho en la kriza de 1898 i avian pedrido sus kolonias.
Pulido era un admirador de los Sefaradis, de sus nobleza, de sus rikeza i de sus talentos ekonomiko. El, mezmo peno ke se avra eskolas ande se iva ensenyar el Judeo- espanyol ke es muy serka al kastiliano.
Pulido, por siguro, ya saviya ke los Sefaradis nunka no ivan a tornar al pais de ande fueron ekspulzado. El keriya ke eyos kontinuen a bivir en la Diaspora, ma en teniendo buenas relasiones kon Espanya. Ademas, Pulido ya saviya ke las Komunidades Sefararadis tenian una simpatia por Espanya i sus lingua; ansi, no iva ser difisil de krear relasiones kon los Sefaradis.
Pulido izo munchos eforsos ma no puido realizar su dezeyo. Ma djuntos kon esto, el reusho a krear una atmosfera de amistad i de simpatia en los Espanyoles por los Sefaradis.
