Ombre prestijyozo por su lucha insesante en favor de la seguridad de su puevlo, el aktual Prezidente del Estado de Israel fue syempre un kombatyente inkansavle kontra los asaltos terroristos i patikularmente kontra los dirijentes de este movimyento, ke akseptan de sakrifikar salvajemente sus propyos ijos en vista de azer murir los del vezino.
Paralelamente, Shimon Perez es el artizano fervyente del establesimyento de una Paz duravle i un dialogo ke, presto o tadre, ayegara a una situasyon de non belijerensya i mizmo de kolaborasyon mutual.
Desde los anyos leshanos de su manseves, el ovro por la defensa de su payis .Mas ke un ombre de aksyon, el es un Ombre de Estado ke mira no solo el “immedyato” ma sovre todo lo ke ay detras de este “immedyato”. El supo tener en sus relasyones kon los reprezentantes de las potensyas estranjeras, un dialogo de una tal profondura de razonamyento i de komprensyon ke le permetyo de ser muy estimado por la mas parte de sus interlokutores.
Su aktividad en el governo fue progresiva i nunka interrumpida. En 1947 a la edad de 24 anyos, el entro en la Hagana i fue dezinyado por Ben Gurion: shefe del departamente de “rekursos materyales i umanos”. En 1952 el fue elejido deputado en la Kenesset i en 1953 direktor jeneral del buro del Ministeryo de la Defensa.
En 1954 el fue mandado en Fransya en el eskopo de krear una kooperasyon entre los servisyos de informasyon de los dos payizes en sus kombate kontra el enemigo komun de la epoka ke era el Ayifto. En 1956 adkizisyon del primer reaktor nuklear de Dimona i tambyen del aeroplan a reaktor “mirage”. En 1959, Shimon Peres fue nominado Vice- Ministro de la Defensa, en 1969 ministro sin portofolyo i syete mezes mas tadre ministro de la İmigrasyon, de la Komunikasyon i del Transporto. En Marso 1974 Ministro de la Informasyon i en djunyo del mizmo anyo “Ministro de la Defensa”.
I ansi suksesivamente asta muestros dias, dos vezes Primer Ministro i en ultimo kavzo Vice Primer Ministro del governo aktual.
El apoyo la politika de Sharon de utilizar la armada Israelyana para destruir la infrastruktura politika del terrorizmo Palestinyano, i tambyen, mas tadre, kontribuo a la desizyon de liberar territoryos palestinyanos provizoryamente okupados por las fuersas Israelyanas.
En 1994 Shimon Perez partajo kon Yitzhak Rabbin i Yaser Arafat el Premyo Nobel de la Paz, i en 1997 fue fundado el “Sentro Peres para la Paz” ke tyene komo objetivo de krear una baza de rekonsilyasyon entre los puevlos del Oriente Medyo, ke sera la primera infrastruktura de un desvelopamyento sosyo- kultural i de una kooperasyon mutual. En este buto fueron kreados programas agrikoles komun, formasyones de medikos i terrapistos espesyalizados en pediatria i korsos esportivos Israelo- Palestinyanos. Munchas ermozas palavras son atribuidas al prezidente Shimon Peres. Entre otras: “Si un problema no tyene solusyon es ke no es un problema, ma un fakto koryente, el tyempo lo rezolvara”, i a la muerte de Itzhak Rabbin: “Puedesh matar mil personas, akurtar vidas umanas, ma no puedesh azer despareser una idea”, tambyen: “Los arabos empesaron a entender ke no es la provedad ke provoka la terror, ma la terror ke endjendra la provedad”.
El eskritor Amos Oz, buen amigo del Prezidente, tyene dicho ke ay en Shimon Peres un poko del ninyo ke el fue en su chikes. “kuryozo”, “avido de amor”, “avido de konosensya”.
