Limmud Kültür Festivali, bu yıl da konularında uzman yerli ve yabancı panelistlerin katılımıyla gerçekleşti. Yazarlarımızın sunumlardan derlediği notları ve edindiği izlenimleri aktarıyoruz...
Limmud el treser Festival kultural de muestra komunidad
Manifestasyon kultural anual, “Limmud” devino una tradisyon en muestra sivdad i kaji (kon la varyedad de los sujetos ke son tratados) un ritual .
Mezes de aparejos, de esforsos i de bushkida en el espasyo de la saveduria en jeneral, ansi ke en el kampo de los problemas kontemporeanos ke tyenen un impakto inevitavle sovre mozotros.
I despues de la manifestasyon, en la asistensya, en el simple publiko, una ermoza efervesensya : diskusyones, kambyos de impresyones i de ideas, orizontes muevos ke se avren para numerozas personas, etc... etc...
Ay en este momento, en muestra komunidad, komo un despertamyento de la kuryosidad kultural ke no se limita solo a un chiko serkle de intelektuales ma es avyerta a todos.
Una muy ermoza kopla biblika ilustra este presyozo evenemento sosyo- intelektual: “Konvoka el puevlo entero: varones , mujeres, ninyos, ansi kel Estranjero ke se topa en tu sivdad, afin ke oygan i se ambezen ( Devarim/Deut. 31/12)”
Un grande intelektual orijinaryo de muestro payis de retorno por unos kuantos dias
La semana pasada tuvimos el grande plazer de enkontrar la Sinyora i el Sinyor Nimet i Izak Yerushalmi de pasaje en Estambol, personas de muy ancha kultura, espritos briyantes i avyertos a la realidad, kon sus respekto del pasado aliado a una vizyon rasyonalista del avenir.
Ensenyante de Universita en los Estados Unidos, el Prof.İzak Yerushalmi mos arrelumbro kon su saveduria i la profundidad de su razonamyento.
El konose una multitud de linguas kontemporeanas komo tambyen antiguas kon sus fonetika, sintaksa i semantika propyas, lo ke le permete de trasar tablos komparativos entre eyas, i de estudyar los puntos ke las aserkan en el kampo etimolojiko.
Ke glorya para mozotros de tener semblavles ko- relijyonaryos, orijinaryos de muestra komunidad.
