Tiberias antigua revela su gloria

Ninet BİVAS

En el anyo 1920 kuando los lavorantes estavan enderechando el kamino entre Tiberias i Zemach toparon unas kozas ke los detuvo de kontinuar: la antigua sivdad de Hamat Tiberias i una menora ke oy en diya se topa en el museo de ?srael en Jerusalem. Esta sivdad era renomada en los tiempos de la Tora por sus aguas kayntes ke aprovechavan a siertas hazinuras. Un poko mas al sud de Tiberias las aguas kontyienen 17 minerales kayntes kon una temperatura de 60 grados par ariva. (de aya vyene el nombre Hamat ke deve de dizir kaynte) Munchos anyos dospuez los Romanos ke les plaziya lugares de paseyar lo izyeron una estasyon de divertizir i eskansar. Oy mezmo en el sud de National Park se puede ver las aguas buyendo ke vienen de la tierra. Las deskuviyertas arkeolojikas oy son parte del National Park. Lo mas emportante es la Sinagoga del 2 siglo antes del Christo. Pensan ke es lo ke kedo de la Sinagoga Severus, en los tiempos ke el Sanhedrin era en Tiberias. Unos de los mas ermozos mozaikes fue topado. El motif de los sinyos del zodiak kon figuras reprezentando las kuatro sezones en kada kanton. Esto ya era muy komun en estos tiempos ma lo ke mos enkanta es en el sentro la fotografia de un dyo pagano Helios en su karosa Romana. Mirando de serka se ve letras en Ebreyo eskritas de una manera yerada. Esto prova ke no era el echo de un artisto Judyo ma de los paganos. Un poko al norte los arkeloges estan kontinuado a eskavar. Hadrian aprovo de azer aki un templo pagano para kompletamente espareser el Judaizmo.