Dora NİYEGOTodos savemos ke los kantes, las kantikas, las romansas tienen orijines espanyoles ma i una parte de la muzika de los sefaradis, fue enfluensada de los puevlos ke los sefaradis bivyeron endjuntos. Los Maftirim son unos de estos kantes ke fueron enfluensados de la muzika Turka. Los Maftirim son tekstos relijiozos ebreos kantados kon melodias de la muzika mistika muslumana de los Sufis, Mevlevis i Dervishes...
“A la persona ke save emplear el diya kon echos provechozos, la verdadera felisidad vyene oras de tadre...” (Corneille 1606- 1684)
Coya DELEVİ
La fraza de arriva, del famozo eskrivano Fransez, no tyene puede ser algun raporto direkto kon el sujeto ke eskoji oy. Ma, me plaze por su sinyifikasyon i el mesaje ke kontyene. Kualo es optimismo? Ken es optimisto? No se komo dar una definisyon prechiza, va prevar...
El optimismo yo lo entyendo komo un dono. Es una dispozisyon del meoyo, del korason, de la persona, dandole la konviksyon ke, finalmente lo bueno va triumfar sovre lo malo. Es una tendensya (eğilim) a ver syempre el lado pozitivo de los evenimyentos, de las personas... Es komo tener konfiensa en la reushidad, konfiensa en si propyo. Kijo dezir ke el optimisto mira a la vida de una ventana afirmativa. En todo kavzo no kale mesklar esta nosyon kon un djugo kontinual (sürekli) de “Pollyanna”!!”
Ya es verdad ke dishe ver las kozas de una ventana pozitiva. Ma, atansyon!.. aki no kero ke ayga dingun malentendido. No kero absolutamente dezir ke se deve todo el tyempo mirar kon entojos de lunas” roz”, komo dizimos en Turko:” Hayatı toz pembe görmek!”... Esto es yerro... Es yerro de pensar kontinualmente, ke todo esta verjeles. Es yerro tambyen no ver las mizeryas, los problemas de la vida.
Yo kreo ke la persona optimista es korajoza, piadoza i altruista. No es egoista. Se rende kuento de las difikultades suyas, ansi ke de las del d’enfrente. No dize:” Me lo futro!” Bushka remedyos de dar apoyo, de topar los byervos para “remontar” el moral. No son palavras al ayre, o byervos solamente por konsolar. Es sinsera porke tyene la kreensa ke, de una manera o otra, se va topar una solusyon del problema. Asigun mi, esta kreensa, este apoyo aze kreser tambyen chikos semyentes (tohum) de amistad, de esperansa en los korasones.
No esto tan sigura de aver enteramente reushido a eksprimir mi idea. Espero ke si... Devo dezir ke esto agora, en una de las ralas vezes ande me syento en difikultad de topar las ekspresyones o byervos egzaktos...Enfin!... Komo lo dishe el optimismo es un dono, una fakultad (yeti). Es tambyen una partikolaridad rezya (sağlam bir özellik) de la persona, una kapachidad. Aki keridos amigos vos dare un sekreto! Yo so muy kompetente! en este domeno( sin falsa modestiya!!)... So muy seryoza en afirmando esto. Es mi kreensa pozitiva, ke fue, i es oy en diya, mi fuersa moral en la vida. Syempre pensi ansi:” Kualas ke seyan las deziluzyones de ayer, oy tenemos muevas esperansas. Kualas pueden ser las difikultades de oy, estaremos prontos para venserlas. En la mezura de la posivilidad, no permeteremos a los problemas de ayer de impedir las okazyones provavles del diya prezente...” Espero ke no vos enfasyi kon mi filozofiya!...
En terminando este artikolo, kero transmeter un mesaje anonimo: “ Syendo un miembro de la populasyon aedada, oy demanyana me sinti orozo de pueder alevantarme de la kama... Kontente de tener un techo sovre mi kavesa... Kontente de pueder meldar mi primer e- mail del diya... Kontente de ser kapavle de emplear el klavye de mi komputadera...”
Keridos lektores, estas frazas no son miyas. (aun ke i yo syento lo mizmo) Son propozitos de una persona de 84 anyos... No se si ay mas menester de komentaryo, ke dizish?
