Dora NİYEGOTodos savemos ke los kantes, las kantikas, las romansas tienen orijines espanyoles ma i una parte de la muzika de los sefaradis, fue enfluensada de los puevlos ke los sefaradis bivyeron endjuntos. Los Maftirim son unos de estos kantes ke fueron enfluensados de la muzika Turka. Los Maftirim son tekstos relijiozos ebreos kantados kon melodias de la muzika mistika muslumana de los Sufis, Mevlevis i Dervishes...
Şeli GAON
La semana pasada fuimos envitados kon mi marido a un kazamyento de unos amigos de la edad 50- 55; ke tuvo lugar en el departamento de la meri (nikah dairesi).
Un kazamyento es un evenemento ke se produisa kon la veluntad de una mujer i un ombre ke se keren byen i demanda muncho esforso (çaba). Dos personas diferentes, ke vyenen uno de kada lugar i se renkontran debasho de un tejado; es difisil de akordarsen!.
Myentres ke son de una edad avansada; ke tyenen manyas i puntos de vistas diferentes; avenirsen en una kaza no es muy fasil.
La amistad resiproko; es un kontakto limpido, muy presyozo entre dos keridos, i aze naser la kerensya.
La Kerensya es pueder asosyar dos karakteres diferentes, kon un esforso resiproko.
Yo penso ke; la kerensya es la baza de todo modo de akontesimyento, es la konsensya (bilinç). La baza de la kerensya es el respekto.
Despues de la meri, vinimos a sus kazas kon todos sus famiyas, ijos, ermanos, amigos i vizinos. Aviya kuarenta personas, todos entimos unos kon los otros.
Una meza ordenada kon un mantel de dantel; todo modo de salados, dulsuryas i bevyentas. Un garson azyendo servis, demandando lo ke dezeamos.
El tyempo klaro, kon el sol briyando. El balkon yeno de rozas de kolores diferentes..
Mi amiga muy fina, delikada, byen vistida kon el chapeyo ke le fue muncho, estava muy oroza de este evenemyento. Mi amigo novle (asil), henozo i kultivado mos resivyo a su kaza en dizyendo; ke somos los mas serkanos i ke tuvo muncho plazer de muestra asistensya.
Uno de muestros amigos tuvo la idea de yamarmos allado de el; por kontar los sentimyentos ke tenemos enverso de los muevos kazados. Todos avlaron a sus maneras, los rekuerdos ke tuvyeron kon eyos, i la kontentes de verlos adjuntados.
Aki, puedemos ver; la fuersa de la kerensya; ke es la enerjia positiva, por adjuntar los amantes. La vida es la reushitad de kolaborar kon su kompanyero i su famiya kon sukseso.
La mizma semana el 18 oktobre djugeves, partisipimos a un paseo nostaljik de muestra sivdad, organizada por el Dr. Robert Schild en el sentro kultural de Neve- Shalom, kon la boz de Sema i las palavras de Mario Levi.
Sema; empeso a la muzika en 1983 en Berlin. Eya empeso kon la muzika klasika turka, i kontinuo kon las kantikas Yidish del Gheto, i kreo en la jazz; su interpretasyon partikolar. Sema mizmo ke es kantadera; es una buena artista de teatro. Tyene una boz muy diferente, briyando komo la seda, kuando la estaj oyendo; puedej sintir un estremesimyento (ürperti); aryento del korason.
Mario Levi; empeso a eskrivir emprimero en el jurnal Şalom i despues en el Cumhuriyet i Milliyet. Gano munchos premyos en el espasyo de la literatura. Tyene munchas ovras. Oy en dia es profesor en la universita Yeditepe. El tyene una avla muy dulse, i un tono ke aze oyer a la persona.
Sema kanto; kantikas en turko, grego, ermenesko i en judeo- espanyol. Kantikas del puevlo, kantes de aninar (ninni), romansos, tangos, kantos i kantes divinas (ilahi).
Mario presentando las rejyones partikolares; komo Selanik, Rumeli, Balat, Samatya, Sulukule, Tatavla, Arnavutköy, Büyükdere, Göksu, Kuzguncuk, La Kula, Pera i las Adas; en el tyempo ande biviyan los djudyos, gregos, ermenis i turkos todos endjuntos komo una famiya; komo ermanos, i mostrando fotos de estas rejyones. Sema kanto kon su boz veramente inkomparavle (eşsiz). Eya namorada de muestra sivdad, ke todas las kolores diferentes se akordan en esta sivdad ermoza : Estambol, mos izo un banketo de muzika (müzik şöleni) maraviyoza. Fue una nochada muy reushida. Penso ke va ver la kontinuasyon de estas nochadas kulturalas.
En esto remersyo a los dirijentes de Neve- Shalom, kon el organizator Dr. Robert Schild, i la boz ekselante de Sema i la avla perfekta de Mario Levi por esta nochada fabulosa.
