Los primeros Maftirim son kompozados por el poeto i el kompozitor judio, Rabbi Shelomo Mazaltov ke bivyo en Estanbol en el diseshien siglo, en el tiempo de Suleyman el Maraviyozo (Muhteshem Suleyman). Mazaltov adapto los makames de la Muzika Ottomana a las poemas mistikas en ebreo.
Esta tadision paso a Iderne (Edirne) a la fin del diisetiem siglo. Akeyos dias, en Iderne aviya una grande komunidad judia. Los kompozitores relijiozos de esta sivdad krearon mas de sukuenta makames ke fueron kantados kon grande entuziazmo por mas de trezientos anyos en esta komunidad.
Kon anyos, esta tradision komo munchas otras fue olvidada. Anyos antes, en la Sinagoga Neve Shalom de Estanbol, aviya un koro de Maftirim, ke kantavan en los dias de Shabbat i en las fiestas.
Unos kuantos anyos antes, kon la reanimasion de la lingua i las tradisiones sefaradis, esta tradision empeso a vinir atras. En el anyo 1991, un grupo de mansevos en la direksion del Hazan Aron Kohen se reunieron para formar un koro kon el nombre “Maftirim Korosu”. En el anyo 1999, este grupo kontinuo en la direksion de Menahem Ezkenazi (el Haham I Hazan de la Sinagoga Hemdat Israel de Kadikoy). Este grupo es konstituado por Bensi Elmas, Robert Elmas, Sabi Iyigor, Selim Iyigor, Selim Bihar, Albert Guzelbahar, Nesim Beruhiel, Beni Albukrek, Jak Pardo, Mordo Razon, Rifat Dana, Izak Edili, Sedat Amon i Yusuf Kaspi. Este koro empeso a kantar estos kantes en las fiestas i en konsertos espesiales. Estan tambien kontinuando a asistir todos los konsertos ke sembolizan el mozaiko relijiozo de Estanbol (estos konsertos se yaman “Living Together”). En los grande sentros de muzika de Estanbol (komo Ataturk Kultur Merkezi i Cemal Reshit Rey), los Maftirim estan kantando endjuntos kon los koros musulmanes i kristianos Este enverano, en la isla Prinkipo (Buyukada) los tres koros endjuntos dieron un konserto maraviyozo al puevlo de la isla. Aparte de esto, los Maftirim partisiparon al Festival del Enkontro de las Sivilasiones en Hatay (Hatay Medeniyetler Bulusmasi Festivali).
Un album de diskos de Maftirim, kantados por los mijores hazanes de Estanbol, se esta produizando por el Sentro de Kultura Sefaradi Turka (en la direksion de Karen Gershon Sharhon).
Este album va tener una grande valor en el futuro porke va transferar a las jenerasiones futures, los Maftirim ke es una de las mas ermozas tradisiones de los judios sefaradis.
