Una noche de Shabat en una Keila de Frankfurt

Klara PERAHYA

Ay dos o tres semanas de esto, tuvimos el plazer de resivir la vijita de muestro amigo Heiny Gross, ombre de ancha kultura konjuntamente oksidental i ebraika.
Esta vez mos avlo al sujeto de un viaje ke el avia echo, unos kuantos anyos antes,en Frankfurt.
Una tadre de vyernes, solo en esta sivdad almana, el kijo ir al kal i demando a la resepsyon del otel ande kedava, el adreso de la mas serkana sinagoga. La ke le indikaron era la mas vyeja de la sivdad, derrokada en la epoka nazi ma restorada mas tadre por la komunidad djudia.
Una vez en la Keila, Heiny demando si puedia dezir un kadish al nombre de su padre , lo ke le akordaron sin difikultad .La asistensya no era muy nombroza, a un syerto momento muestro amigo se apersivyo ke poko mas leshos de ande se topava asentado, de la vanda opozada a la suya, un yahid entre 30 i 40 anyos de edad lo estava fiksando kon una chika ekspresyon de sorpreza en la kara, asta no kitar los ojos de sovre el.
Despues de la orasyon el mansevo se aserko de el i le demando:
- Tu sos Sefarad ?
-  No, Ashkenaz
-  Portanto kuando resitates el Kadish, tu pronunsyates “Baruh Ata A...” i no “Boruh Ata A...”
-  Tyenes razon, en mi manseves bivi 8 anyos en Israel i la sinagoga la mas serka de mi morada era sefarad ... mizmo aktualmente me akontese muchas vezes de ir al kal de los sefaradim.
-  Ande moras aktualmente?
-  En Estambol,
-  Ha Estambol! agora entyendo.
La konversasyon fue larga entre eyos, el mansevo alman lo kumbido a su kaza i le propozo de ir el dia sigyente, para la tefila de Shabat demanyana, a una keila de kabalistos no muy leshos.
-  Sos kabalisto? le demando muestro amigo
-  No... la verdad es ke no esto ainda pronto. Por kontra tu puedras estudyar la kabala
-  Yo? Donde saves?
-  Tu “ashkenaz” vas al kal sefarad...Penso ke vozotros los turkanos tenesh un entendimyento de syertas kozas,mas profundo ke mozotros, bivish en una sivdad ande las tres relijyones se enkontran kada dia i tyenen kontaktos las unas kon las otras”.
Heiny Gross konkluo:
“Ay munchas maneras de estudyar la kabala, eya es echa de una multitud de simbolos ke kada uno puede interpretar de una manera diferente...
Esta de alkavo remarka de muestro amigo me impresyono muncho .... desde mi chika edad una kestyon me obseda: ”Eske todos entyenden el mizmo teksto de la mizma manera?”, "Es ke tenemos todos la mizma komprensyon de la koza ke meldamos, vemos o oyimos? ".
Por seguro no ay una sola manera de meldar un livro ... los unos lo meldan byervo por byervo .. otros van mas aya kel byervo, komo si kada teksto tyene munchas vezes dos sinyifikasyones: "la ke mos da la eskritura literal kon su semantika propya" ... i la otra  "la eskondida, kon sus ezitasyones inevitables i su eternal bushkida de una verdad ke syempre parese fuir de delantre mozotros".