Los desendientes de los Maranos ke estan deskuvriendo sus Identidad Judia, se estan konvertiendo al

Dora NİYEGO
Juan Mejia era siguro de suitidad katolika asta ke teniya kinze anyos. El se engarandeso en Bogota  Kolombia. Su padre era doktor i su madre era eskultor (heykeltras). Juan estudio en una eskola katolika en la sivdad. Un dia, en una reunion de famiya, uno de sus tiyos empeso a burlarse de los judios. El nono de Juan se inyervo muncho a esto. “Mi nono era Judio” les disho. “En mi famiya, los ombres aziyan orasiones en sekreto, i se metiyan shales en la kavesa”.
Kuando Juan diskuto este insidente kon sus amigos, el deskuvrio ke i eyos teniyan estoriyas asemejantes en sus famiyas. Enduna, se konsintieron ke sus nombres  tienen orijin judio: Mejia (Mashiah), Spinoza, Akosta, Erdozo. Uno de sus amigos les disho ke su nona ensistiya ke no koman karne kon prodaktos de leche porke no es saludozo.
Juan no tardo a realizar ke sus parientes eran desendientes de maranos. Los maranos son los judios espanyol i portugues ke se konvertieron al kristianizmo pormodo ke no puedieron rezistir la presion de la Engizision. Ma eyos kontinuaron a obzervar los kostumbres judios en sekreto, ma kuando fueron deskuvridos, fueron ekspulzados de sus paizes. Algunos de eyos se fueron a la Amerika del Sud.
Duspues ke Juan deskuvrio su identidad, su viyaje al judaizmo empeso. En el anyo 1998, Juan se fue a Israel. “Del primer momento, sinti una amistad por el pais i la lingua” esta dizyendo Juan. “Me fui a Yerushalaim, viziti el Kotel. Me sinti ke pedrimos una grande oporunidad (firsat) en konvertiendomos al kristianizmo. Me inyervi a mi famiya. Pensi ke durante kinyentos anyos, sus padres reusheron a konservar la tradision judia ma eyos desharon esta tradision. Agora kaliya azer todo posivle para reglar las kozas i konvertirme al judaizmo”.
Duspues de su viyaje a Israel,  Juan torno a Kolombia i empeso a estudiar Judaizmo. Un sierto tiempo duspues, el se fue de muevo a Yerushalaim para estudiar Teolojia (din bilimi) en la Universidad Ebrea. Su famiya se opozaron a su desizion porke era el tiempo de la Segunda Intifada. Ma Juan no troko de idea. En kontinuando sus estudios akademikos, el asistio a las aktivitades de las yeshivas en la sivdad. Esto lo aserko mas muncho al Judaizmo. Keriya konvertirse al judaizmo komo un konservador. Ma para pueder kazarse en Israel, kaliya konvertir en el etranjero. Juan konvertio en New York I torno atras a Israel para estudiar la Torah. Aya konosio su mujer, Abby Jacobson, una estudiante de la Yeshiva.
Entremientes, la istoria de Juan aparisio en el sitio web de la Ajensia Judia. Ansi Juan empeso a ayudar otros desendientes de maranos en el mundo entero. El i su mujer se fueron a New York para asistir al Seminario Teolojiko Judio de los Konservadores. Juan agora tiene trenta anyos i es un rabbi en la Sinagoga Konservativa en Bronx. Los judios de su kongrasion on lo mas imigrantes de Puero Riko.
Juan esta dizyendo ke tres faktores lo ayudaron a realizar su esuenyo. El primer es la diversidad (cesit) ke empeso en la Amerika del Sud en los anyos dalkavo. El sigundo es el Internet ande puedes rankontrar todo modo de djente. I el treser factor es la egzistensia de Israel.
“En Lizbon, ay una komunidad maraviyoza de maranos ke estan penando a konvertirsen” esta dizyendo Juan. “Ma estos son djente edukados ke saven lo ke keren. En la Amerika del Sud, la djente no son edukados, son mas proves i el rasizmo dainda egziste aya”.
Juan tiene planos por el futuro El esta empleyando el Internet para realizar sus planos. Esta tambien lavorando para aparejar un siddur (livro de orasiones) especial, ke va prezervar el formato de orasion de los judios ekspulzados. Todas las orasiones vana ser publikadas en tres linguas: en ebreo, en ingles i en espanyol. Este siddur va ser bazado en el siddur de la komunidad judia portugues en New York.
Juan esta azyendo otros planos para establisir una Yeshiva por los maranos en el Sud de los Estados Unidos. El tambien kere fondar una eskola para aparejar lideres i kere estblisar un tribunal especial de rabinos de la conversion.
Su mas grande esfuenyo es de avrir una Yeshiva de la lingua espanyola ke va server no solo a los desendientes de los maranos, ma a todos los judios ke avlan espanyol.