El sujeto es difisil, el eskritor lo tomo en mano kon koraje i muncha sirkunspeksyon (ölçülülük, ihtiyatlılık). No se save egzaktamente la data de nasimyento de Günzberg 1874/1875 o 1876? Rifat Bali mos desha supozar, sin byen entendido nada afirmar, las kondisyones en las kualas la famiya emigro de su payis de orijen al Emperyo Ottomano.
Las difikultades de los “muadjires” (emigrados) ke venian de la Evropa del este eran grandes asta pueder adaptarsen al ambiente del payis de akolyo. Savemos ke la madre de Sami Günzberg era lo ke se yamava al tyempo una “bohchadjia” i ke tenia la posivilidad de entrar libremente en el Harem del Palasyo Imperyal i de munchas otras rezidensyas de novles, lo ke avyo mas tadre para su ijo la puerta del Saray.
La epoka ande bivyo Sami Günzberg era para la Turkia fertil en rivalidades i evenementos kontraryos los unos a los otros... De una parte la dekadensya de un imperyo ke 4 siglos antes era una de las mas grandes potensyas del mundo, de la otra la emerjensya de un governo demokratiko kon las ezitasyones propyas a la aplikasyon de un muevo sistema.
Sami Günzberg fue un testigo de este periodo. Dentiste de los mas grandes dirijentes de las dos epokas (del Sultan komo tambyen mas tadre de Atatürk, Ismet İnönü, Adnan Menderes ets...) el fue munchas vezes sus konfidente i mizmo, a syertos momentos, indirektamente, un poko sus konsejero.
Rifat Bali izo un lavoro de investigasyon eksepsyonal. El mos dyo no solo el kontenido de dokumentos ofisyales ke tuvo la abilidad i la perseverensya de bushkar en los arshivos, ma tambyen (bazandose sovre multiples livros i artikolos de gazetas de entonses) el mos transmetyo refleksyones i supozisyones ke fueron echas a esta epoka, laskualas son indisyos de las diferentes maneras de pensar i djuzgar de akel tyempo.
Bushkar la otentisidad i la klaridad es, para kualkyer Istoryano, un imperativo absoluto i Rifat Bali en kada sirkunstansya mos da la prova de su fidelidad a este presepto.
El pusho mizmo la mitikulozidad asta darmos chikas informasyones sovre varyas personas kon las kualas Sami Günzberg tuvo kontakto, komo: “Moshe Sharet futur Ministro del eksteryor Israelyano”, “Haim Weizmann futur Prezidente del Estado de Israel”, “Laurence Steinhardt Juristo i ekonomisto, embashador de los Estados Unidos en Ankara”, “Haim Barlas reprezentante del Kongreso djudyo mundyal”, “la jurnalista i eskritora Münevver Ayaşlı”, “el Op.Dr.Emin Erkul”, “Prof. Dr. Ernst E. Hirsch”, “Prof. Dr. Alfred Kantorowicz”, “el Avokato Nesim Mazliah myembro del “ Ittihat ve Terakki Cemiyeti”, “Leon Faradji marido de su sovrina” i munchos munchos otros.
El tambyen tuvo entrevistas kon personas ke konosyeron Günzberg de serka, en su vida de kada dia , komo por egzempyo “Klara Schild”, “Robert Schild” ,”Karolina Rabinovich”, “Gilda Kamhi, mujer del asistante de Günzberg”, “Ivet Bigio ija de del avokato Gad Franko buen amigo del dentiste” ets... ets... ke mos dyeron una idea de la atmosfera en la kuala el selebre dentiste evoluo en sus relasyones sosyales..
Rifat Bali investigo en mizmo tyempo al sujeto de la aktitud de Günzberg enverso la komunidad Djudia de Turkia, sus reaksyones delantre diversos kavzos negativos a loskualos muestra kolektividad fue envezes konfrontada: “los akontesimyentos de Trakya”, “el impuesto sovre la fortuna(varlık vergisi)”, el antisemitizmo ets... ets...
Komo lo dishe mas ariva, la biografia de un grande ombre no es solo el relato de su vida individual kon su kontenido familyal , profesyonal i afektivo, ma tambyen el relato de una epoka, de la situasyon del payis ande el evoluo, el reflekto de las diferentes maneras de pensar de akel tyempo ansi ke de las reaksyones enversos los divers evenementos ke lo traversaron.
“Koordonar todas estas informasyones i formularlas en sus realidad i sus kontinuidad” nesesita una konsensya profesyonal intransijente envers si mizmo. Rifat Bali lo izo kon su objektividad byen konosida i su probidad abitual.
