La ventana de vuestra ermana Los Sesenta Anyos d`el SALOM

Şeli GAON

El 07.10.2007 alhad despues de midi, el jurnal ŞALOM organizo un dia maraviyozo, para fyestar sus sesenta anyos; i por azer konoser el “Almanak” ke aparejo. Fue un dia ke dyo kontentes, ke satisfezo a todos los ke partisiparon.
Mos fuimos al otel Ramada en Pangaltı; i en la puerta; el administrador de la prensa Yakup  Barokas kon su mujer eskrivana Nelly Barokas, i la direktora de la publikasyon Tilda Levi kon el konsejero del Rabinato Moris Levi mos arisivyeron kon karas riyendos. Se sintiya ke aviya una luz en sus karas; el kalmo del aparejo de este dia ke demando munchos aprontos para pueder reushir a esta organizasyon ke se izo kon muncha aplikasyon (özen).
En entrando al salon de las konferensyas; estas karas aklaradas komo la luna me dyo una motivasyon i ardor de topar un lugar de ande va seguir (izlemek) los ke van a darsar (konuşmacı) un momento mas presto. Despues del diskorso de la avyertura de Moris Levi; la Professora Dr. Esther Benbassa empeso a avlar de la identidad de los djudyos.
“En el tyempo del imperyo ottomano Bayezit ke arisivyo a los djudyos de la Espanya; izo ganar al pais una kreasyon de renovasyon (yenilik) en los puntos de vista teknikos modernos, i komersyal. Los djudyos eran los intermedyaryos (aracı) emportantes entre el Occidente kon el imperyo ottomano.
En el imperyo ottomano; los djudyos eran aklarados, avyertos a todo los modeles sovre todo en la edukasyon, en la konosensya. Eyos son fidelos a sus paises. Los djudyos de la Turkiya no posan dingun problema sosyal; no se amostran muncho; i no peryeron sus identitades.
Esther Benbassa termino su diskorso en dizyendo; ke la identitad djudiya nase en la relijyon.
El djudaismo es una relijyon i un puevlo...”
A la fin de la avla de Esther Benbassa; uvo un panel ke la dirijente Rina Eskenazi; mos izo konoser el eskrivano Moris Farhi ke esta bivyendo en Londra, la Prof. Dr. Elda Abrevaya i el Prof. Dr.Edhem Elden muy sempatiko ke disho en kurto; ke los djudyos biven entre eyos komo un getho i rezolven (halletmek) sus echos entre eyos.
Moris Farhi gano un premyo (ödül) kon su romanso “Genç Türk” (el mansevo turko) i avlo enriva de ser una minorita en kualker pais.
“Mos konto ke en su manseves tuvo un amigo zingano i ke se ambezo kozas diferentes de las personas diferentes. Se ambezo ke la pluralitad (çoğulculuk) ez la prosperidad (refah) de las minoridades (azınlık). La pluralitad es la demokrasiya i es muy emportante para la kontinuasyon de la umanidad.  La pluralitad es muy fuerte en la Turkiya. La veluntad de bivir endjuntos de las personas kultivadas nasyo en el imperyo ottomano i kontinuo komo un prinsipyo (ilke) emportante fina oy. Moris Farhi termino su diskorso en dizyendo: “Ser minoridad es; ser armonyozos (uyumlu).
El Ladino es la lingua de los sentimyentos, de las savores ke transfera (aktarmak) las tradisyones djudiyas sin ser duros...”
A la fin Elda Abrevaya avlo de “ ser djudyo entre la sufriyensa i el entuzyasmo”.
Despues aviya un kokteyl kon la orkestra de Cenk Rofe i sus kantikas modernas.
A la fin; Moşe Grosman ke lo konosen komo la persona la mas serkana de Avram Leyon (zihrono livraha), izo un diskorso kurto en dizyendo ke va entregar los furnimentos personales del defondo, a Yakup Barokas por ekspozarlos en una vitrina del jurnal.
Yakup Barokas arisivyo kon grande plazer este regalo i avlo kon Tilda Levi, Silvyo Ovadya i Naim Güleryüz por el fondador del jurnal :“Avram Leyon” ; de la ovra ke kito enmedyo i de su ambisyon para kitar este jurnal kada semana, kon la ekipa de volontaryos ke ayudaron fina oy.
Oy; el kontenido (içerik) del jurnal kon su suplemento “Amaneser”, esta meldado por una grande partida de los djudyos en Estambol, i en el mundo entero. Lo ke es de arrogar es; ke los abonados pujen de dia en dia.
İ yo; keridos lektores; kero felisitar a todos los dirijentes profesyonal i volontaryos, de la aktividad i del sakrifisyo ke estan azyendo por azer bivir este jurnal.
“Syempre de mijor a mijor; i ke el nivel del kontenido ke se enalteska de dia en dia i buena reushitad!...
Keridos dirijentes; vos remersyo por el dia fabulozo (olağanüstü) ke pasimos alhad pasado.