Dora NİYEGOEn el siete de Oktober, en la okazion del aniversario del sesenten anyo de la gazeta Shalom, los otorizados de la gazeta aparejaron un program inolvidable en el Otel Ramada Plaza en Estambol, por selebrar este evenemiento.
En la inogurasion (acilis) de la selebrasion, Moris Levi, uno de los otorizados de la gazeta, mos avlo del empesijo i del progreso de la gazeta; de las penas del fondator Avram Leyon i de los esforsos de los amator eskridores para reushir a publikar la gazeta kon nuvelas enteresantes kada semana. A lo ke mos ambezimos de Moris Levi, duspues de la gazeta Cumhuriyet, Shalom es la segunda vieja gazeta publikada en la Turkiya, i en el mundo entero, es la sola gazeta ke tiene una pajina de judeo- espanyol.
La primera interlokutora (konusmaci) fue la profesora de literature, investigatora i eskritora Prof. Dr. Ester Benbasa. Benbasa mos avlo de la identidad sefaradi; del model del judio sefaradi i de las eskolas de l’Alliansa ke se enkargaron (gorevini gormek) a dar la edukasion judaik a los judios sefaradi del Oriente. Segun Benbasa, los judios del Empiro Ottomano konstituaron un ponte (kopru) entre l’oriente i l’oksidente. En la Turkiya, en total, dozyentas gazetas en judeo- espanyol, se publikaron, en la istoria judia. El espanyol, siendo una lingua evropeana, i el ayudo de estas gazetas en el developamiento de ideas modernas, los aserko a los judios turkos al oksidente; por esta razon, los judios de la Turkiya siempre djugaron el rolo de un ponte en las relasiones de los Turkos kon el oksidente. Segun Benbasa; los Ashkenazes, los Sefaradis i los judios Arabos deven de azer todo posivle para protejar sus kulturas i sus linguas ke son la refleksion de la identidad.
El segundo interlokutor fue un historiano, investigator i eskritor; un professor de la Universidad Bogazici en Estambol, Prof. Ethem Eldem. Eldem mos ekspliko lo ke es ser minoridad en un pais; las difikultades de apertener (ait olmak) a una minoridad, i el yerro de emplear el biervo ‘toleransia’ por las minoridades de un pais. Segun Eldem, por ke un pais seyga ‘kozmopolit’, kale ke tenga una kultura kolektiva, ke va naser de la meskla de todas las kulturas en el pais . Eldem mos dio el egzamplo de la muzika Turka. En el Empiro Ottomano; los gregos, los armenios, los judios i los muslumanes lavoraron endjuntos en el developamiento de la Muzika Turka. Puedemos dizir ke, todos endjuntos reusheron a krear un kozmopolitizmo en este sujeto. En la Turkiya, komo la identidad relijioza es superior a las otras identidades de la persona, dainda no se puede ver una mezkla de las minoridades kon la majorita. Eldem mos disho ke por pueder avlar de la istoria de la komunita judia en Estambol, no tenemos sufizante dokumentos. Ma, en jeneral, puedemos dizir ke los judios de Estambol, fueron siempre inversionistos (yatirimci) chikos, i ke siempre bivieron en los mijores distriktos de Estambol. Segun Eldem, es una perdida ke los judios no estan mas avlando el judeo- espanyol. En los anyos dalkavo, estomos viendo una yida rekto (dogru) la akseptasion de ‘multi- kulturas’ en la Turkiya. El treser interlokutor fue el novelisto de diversos Premios, Moris Farhi. Segun Farhi, la proteksion de las diferentes kulturas i el pluralizmo trayen rikeza a un pais. Si el pluralizmo es kultivado, no puede kavzar una gerra. El Empiro Ottomano siempre fue el protektor de las personas maltratadas ke se refujieron a este pais..
La kuatrena interlokutora, psikologa, investigatora i eskritora, Prof. Dr. Elza Abrevaya mos ekspliko, lo ke es ‘ser judio’. Segun Abrevaya, es posivle de ser judio en maneras diferentes. Abrevaya mos avlo de la identidad judia de Sigmond Freud, ke no es mensionada en dingun lugar. El sentimiento de la identidad judia de Freud, orijiono del antisemitizmo en la Alemanya. Frued no se olvido el maltratamiento ke le izieron a su padre. En la universitad, tambien, le izyeron injustisias por ke es judio.Segun Abreveya, la introduksion del psikoanalisis (deskuvrir la subkonsiensia) de Freud a la psikolojia, es una forma de rebelion kontra la injustisia a su identidad judia. Freud izo la definision de la identidad judia kon estos biervos; “el sentimento sekreto de la identidad”. Segun Abrevaya, la identidad de una persona es “un modo de patronear”. Trokar su nombre es refuzar su identidad. El judeo- espanyol es la kontinuasion de la identidad del judio sefaradi. El judeo- espanyol es una lingua de afeksion por los Sefaradis. Los biervos “hanumika”, “pashaiko” ke oyimos de muestras madres en muestra chikes, mos dan un sentimiento de afeksion. Esta lingua es el pais del judio sefaradi; es el lugar ande el, se siente en sekuridad. El judeo- espanyol, por mozotros, es la lingua de las savores; i la kultura sefarad, mos ajuta una kaynteza al korason. Mezmo si no se esta mas avlando esta lingua, kale ke prezervamos esta lingua i esta kultura. El program kontinuo kon las kestiones de los oyentes. Este panel fue dirijado por Rina Eskenazi ke era una de las otorizadas de la gazeta.
Duspues del kokteyl, ande se korto la tarta del “Sesenyien Anyo” de la gazeta, los administratores del Shalom, Tilda Levi i Yakup Barokas dieron deskorsos sovre la gazeta. Moshe Grosman, Leon Haleva, Naim Guleryuz i Silvyo Ovadia, ke eran los administratores de la gazeta en los anyos pasados, resivieron kada uno, el “Almanak del Sesentien Anyo”, ke fue aparejado por esta okazion. Moshe Grosman transfero a la gazeta, ‘el kreyon, el daktilo, la karta de onor de presa’ ke Avram Leyon le aviya sumetido.
En la seremonia, ande se dio los premios de la “kompetision de Fotografia de Shalom”, Izzet Keribar ( el selebre fotografio) i Mehmet Demirezen ( el mas grande enkargado del Estado de la rejion Shishli), se adresaron a los oyentes. El Grande Rabbino, Izak Haleva, les dio, a los premios, una plaketa, a kada uno. El konser de la orkestra “Istanbul 12”, fue la aktividad final de la selebrasion.
Oguramos a la gazeta Shalom de ayegar al Sentenario Aniversario kon mezmas reushitas.
Shalom, Shalom sesenta anyos para la vejes.
Me falta otros 60 anyos fina sien i vente, entonses esto kontente.
Lores al Dyo i a los lektores.
Akodrandome de lo ke pasi i publiki en mi semanal,
Rogo ke siempre se kumple todo kon mazal.
Longar mas i mas mis nuvelas, para ke sean mas buenas i entendidas.
Para todos los lektores de la pajina, ke no es solo un simbol,
Sino ke es Djudeo- Espanyol.
Orgolyo i gusto me dan kuando la meldan kon muncha amistad.
Ekspreso mis sinseras ideas para ke vaygan a todas las orejas.
Muncho i grande es mi dezeo, arogar al todo Poderozo, Ke mos mande pas i repozo.
Avram Behar / Yerushalayim
