Fin de Septembre...

Coya DELEVİ

Kon un poko de retardo, kero kontarvos mis aktividades de fin Septembre. Las noches  de 28 i 30 asistimos a dos pransos, ke par azardo fueron de un karakter semejante, del punto de vista konsepsyon... Porke eran bazados sovre la “relijyozidad. (no esto sigura si se emplea este byervo, no topi otro!)... El primer fue un “İftar Yemeği” (*) i Alhad el 30 una komida en la “SUKA” de Barınyurt.
Devo aklarar la razon del byervo “azardo” por la komida del 28... Esta data es en prinsipyo data abituala de reunyon de muestro “Klup”, un  “Aniversaryo”. Oganyo koensidando kon Ramadan, i visto el pursentaje % 95 de los aderentes Muzulmanos, se organizo komo “İftar.” Kreo ke ya esta todo semple asta aki!.. Ma, keridos lektores, me parese ke algunos estaran demandandosen:” Ke Klup sera este?” sin desharvos mas en kuryozidad vo mirar de eksplikar...
Muestro Klup  se yama “ PACEMAKER Takanlar Kulübü”. Pacemaker es el byervo internasyonal de “Pil de Korason”. Kualo es “Pil Permanente de Korason”? (kalıcı kalp pili) Es un aparey nesesitedo por los hazinos tenyendo irregolaridad en el ritmo del korason, un dezrepozo importante nombrado: “Aritmi”. Achakes de un serkano miyo, antes 4- 5 anyos ize yo su konosensya!, i esta syempre prezente en muestra vida... no semos entonses tan reselozos komo el presipyo. Ansi ke ansi, mos ambezimos komo navegar kon este dezrepozo.
Asigun el doktor, muestro Klup aki, es el primer de su djenero, i muy provavle el uniko por la ora. Kada anyo mos arrekojemos el 28 Septembre. Mos avizan del lugar i la ora de la reunyon. No puedemos pretender ke mos konosemos de nombre, uno por uno... Asta el anyo pasado eramos los unikos Djudios. Aktualmente se adero otruna amiga, una ansyana konosensya. Todos los miembros (los hazinos naturalmente) son operados en el mizmo ospital i siguro por el mizmo doktor, lo ke konstitua la mas orijinal partikolaridad! de muestro Klup.
En jeneral, despues de komer, el doktor, syendo el prezidente, toma la palavra. Es un interkambiyo de preguntas i repuestas ke bushkan syertos hazinos a sus problemas. El doktor responde kon su pasensya i amabilidad abitual. De anyo en anyo estamos pujando! Muy normal... Oganyo el kantador Selçuk Alagöz, muevamente operado, mos dyo un konser improvizado a la fin de la nochada...
Vinyendo al 30 Septembre... Oras de tadre mos fuimos a Barınyurt, ande estavamos envitados. Sinti plazer de ver figuras konosidas, amigos de mi chikez, del Kal de Los Frankos... A un momento, la verdad ke me enkanti de ver delantre de mi a Jozef Nasi, (para mi syempre Jojo) amigo de chikez de mi ijo... Saver ke oy es el prezidente de la “Fondasyon l Neve- Şalom”... Dishe: “ hey gidi günler hey”... Fuimos vezinos un largo tyempo en Nişantaş kon la famiya Nasi,  mi ijo i Jojo se engrandesyeron  endjuntos...
Visto mi lugar limitado, no puedo dar en detalyo las oras ermozas ke pasimos. Keridos lektores, ay un syerto tyempo ke perkuro a no eskrivir tekstos largos. No kero abuzar, por respekto al derecho de otras amigas. Afilu munchas vezes me esto abstenyendo de mandar artikolos, para pueder permeter a otros de eksprimirsen. Ma, komo lo estash remarkando, no ay munchos dezeozos de akompanyarmos en la oja de Judeo- Espanyol. Portanto ya se ke ay un nombre sufizyente ke estan meldando, ke konosen muestra lingua ansestral. No pyedri dayinda mi esperansa!..

(*)“İftar”: byervo eksprimyendo kortadura de taanit en el mez de “Ramadan”.
 P- S-  Aki kero rengrasyar  Çela i Mordo Zakuto, dirijente de Barın Yurt, ke mos akompanyaron i me ayudaron a tomar fotos kon los pensyonaryos de Barınyurt.  C.D.