Muevas ideas, muevos problemas

Klara PERAHYA

En esta epoka ande el mundo parese aver pedrido su ritmo normal, es kaji kada dia ke mos topamos frente kon frente kon muevas konsepsyones, muevos evenementos, muevos problemas, kada uno diferente de los otros, kada uno kon su kontenido pozitivo o negativo.
Desde un kuanto tyempo (vyernes pasado en el kotidyano “Hürriyet”) meldamos en la prensa estranjera, novedades sovre el litijyo kel Governo Fransez tyene kon su opozisyon i mizmo kon una partida de su elektorato, al sujeto de la aplikasyon del “test ADN a la imigrasyon”
Ke es el problema? “En el buto de fasilitar la reunifikasyon de las famiyas (ijos, ijas, madre, padre) de los ovreros imigrantes en Fransya i espesifikar egzaktamente si los ke azen una semejante demanda son reelmente de la mizma filyasyon biolojika” los dirijentes Fransezes pensaron rekurir a un semejante test.
Nombrozos sitizanos i sovre todo los sosyalistos se revoltaron ke una tala mezura sea aplikada oy en dia  en un payis ke es uno de los prinsipales promotores de la Deklarasyon de los Derechos del Ombre.
La protestasyon fue impulsiva, i mizmo a syertos momentos eksesiva, partikularmente en la klasa intelektuala i mizmo en la mayoria del Senato (myembros de Syedra komo de Derecha mesklados).
Vos vash a demandar “en kualo esto mos konserna? Es ke esto mos toka Relijyozamente, Etnikamente o Jeografikamente? Por seguro No...
Istorikamente? Puede ser Si. El rekuerdo de los testes biolojikos aplikados a los deportados djudyos en los kampos de la muerte nazis esta ainda bivo en muestra memorya i sovre todo en muestra sensivilidad.
En realidad el problema Fransez aktual no es verdaderamente trajiko ma muy difisil a rezolver... de las dos partes argumentos muy konvensyentes son prezentados i no puedemos empidirmos de demandormos:”Es ke esta metoda es praktikavle o kontestavle?” Los avizos seran partajados. De una parte un governo ke tyene el dover imperativo de sovreguadrar el “byen estar” de sus sitizanos, de otra vanda el konsepto sakro de la reunifikasyon de la famiya, kuala sea su filyasyon biolojika o espiritual i el ovligo moral de akudir desmazalados ke se topan en el apreto.
En todo kavzo, no es a mozotros ke kaye de formular un kualkyer duzgamyento; por kontra el problema en el mizmo mos konserna... no solo en tanto ke djudyos ma en tanto ke umanos.
La mundyalizasyon no es solo el libre troke de valores materyales... la libre sirkulasyon de las personas, de las kozas i mizmo de las ideas... la mundyalizasyon es tambyen la partisipasyon (por seguro a un grado diferente) a la mizma emosyon, al mizmo espanto, i puede ser a la mizma esperansa...la mundyalizasyon es la responsabilidad de kada uno delantre el drama ke se pasa a miles de kilometra de distansya...
De todo tyempo los grandes pensadores umanistos repetan ke no se puede gozar kompletamente de ningun plazer si se save kel vezino esta ambyerto.
Ser “umano” es esto.