La peraşa de la samana / Bereşit

 

Judeo-Espanyol
9 Ocak 2008 Çarşamba

Rav Yeuda ADONİ

El Dyo Kriyo todo el mundo, los syelos i la tyera i todo lo ke ay en eyos, en seş diyas.
En el diya sejeno, kriyo al ombre, Adam Arişon i a Hava su mujer. Los metyo a eyos adriyento una guerta nombrada. Ganeden para ke la lavoraran i la guadraran. El Kriyador permetyo a Adam i su mujer de komer de todos los arvoles de fruto ke aviya en Ganeden, afuera del arvol nombrado Ets Adaat arvol de saver ke en komyendo de su fruto aze pujar las dezeos i los visyos del kuerpo. Ke le defendyo de Komer de el.
Hava la mujer de Adam Arişon, se sonbayo de la vista ermoza de este arvol, i komyo de su fruto i izo komer de el i a su marido.
El Kriyador se ensanyo munço kon eyos porke pasaron su komando i los maldişo, i los kito de Ganeden. El Kriyador les izo azer a Adam i su mujer unas kamizas de kuero porke se toparon sus kuerpos ke estavan deznudos.
Adam Arişon tuvo dos ijos Kayin i Evel. Kayin se okupava del lavoro de la tyera arar i sembrar, i Evel se okupava de apasentar los ovejas.
Kayin i Evel truşeron prezente a el Kriyador. Kayin truşo de los frutos de su tyera de lo ke le vino a la mano.
Evel truşo de los primeros nasidos i los mas ermozas de sus ovejas. El Kriyador amostro su kontentes de Evel i de su prezente i abaşo fuego de los syelos i kemo su prezente no estuvo kontente. Kayin se selo munço sovre esto i le guadro mal kerensya a su ermano.
Un diya estando solos Kayin i Evel en el Kanpo. Kayin mato a Evel su ermano. El Kriyador se ensanyo munço kon Kayin, le izo saver ke el ya supo lo ke izo ke mato a su ermano i lo maldişo ke syempre se vaya de un lugar a otro i no tenga repozo.
Vido el Kriyador ke se muçiguo la malisya del ombre en la tyera, i todos los pensamyentos de su korason eran solamente malisya i maleçuriya. İ se arepintyo el Kriyador ke kriyo a el ombre, i se atristo munço. Dize el Kriyador de kitar de el mundo a el ombre ke el Kriyor. En esta epoka solamente Noah fue rengrasyado en ojos de el Santo bendiço el.