El anyo: 5768...

Klara PERAHYA

Judeo-Espanyol
9 Ocak 2008 Çarşamba
Coya DELEVİ
Kada mez de Elul, kuando resivo el muevo kalendaryo Ebraiko, echo un ojo a las datas de dos fyestas: Pesah i el proksimo Roshashana. Deke espesyalmente estas dos fyestas? La verdad ke no tengo un buto prechizo. Es komo una abitud, o mizmo una manya miya!..Para mi, Pesah i Roshashana son komo indisyos de las otras fyestas, puntos de “départ”, asigun dizen los fransezes...Aparte de esto, echo un ojiko i las datas de syertos aniversaryos importantes...
Oganyo la “Halila” esta komo un livriko, bastante entresante, kon su format diferente del ke eramos auzados. Apenas ke vide la data de Roshashana 2008, (empesijo de Oktobre) ya entendi ke tenemos oganyo doble mez de ADAR, lo ke se nombra  “Shneiadarim”: Adar i Veadar...A este heshbon, en 5768 vamos a tener tredje (13) mezes, lo ke aze 383 diyas. Para uno ke no konose muestro sistema del kalendaryo “lunar”, puede pareser estranyo un anyo de 383 diyas!..
En mi prima manseves, syempre bivi este dilemno. Seya mi avuelo en mi chikez, o seya mi padre mas despues, prevaron a darme eksplikasyones. Kada vez meneyava la kavesa dizyendo:”Ya entendi!”...En realidad no entendiya nada!. Era komo una eigma para mi. Anyos pasando, ya reushi a solverla, entendi la sinyifikasyon i el menester de “Doble Adar.” No era tan komplikado komo lo aviya pensado. El anyo pasado (Marso 2006) eskrivi aki un artikolo sovre este sujeto, ke no tengo entisyon de repetarlo. Vo solo adjustar ke ni en 2006, ni en 2007 no uvo Veadar. En el primer No.de “El Amaneser” (Marso 2005), El Sr. Yehuda Hatsvi de Tel- Aviv, en su artikolo mos dyo eksplikasyones muy fasil a entender. Aki, vo relatar unos kuantos paragrafos:
“En estos diyas entrimos kon bueno al mez ebreo ke se yama Adar. Oganyo tenemos dos mezes ke se yaman Adar: El prezente mez ke se yama Adar Alef, i el mez ke vyene detras ke lo yamamos Adar Bet.
Los mezes en el kalendaryo djudio son segun el chark de la luna: i ansi un anyo kontyene solo 355 diyas. Por adaptarlo al kalendaryo segun el sol, adjuntamos kada tres anyos un otro mez de Adar. Esto lo izyeron muestros Hahamim por kumplir lo ke mos enkomenda la TORA, de fyestar el Pesah syempre en el mez de la primavera (Nisan). De muestros vizinos musulmanes (ke uzan solo el kalendaryo de la luna) vemos koza diferente. El Ramadan, por enshemplo, kaye kada vez en otra sezon del anyo.
La fyesta de Purim la selebramos syempre en Adar Bet. Afilu el Bar Mitsva de muestros ijos i nyetos  si kaye en Adar, los Sefaradis uzan ke “kumplen el Minyan” solamente en Adar Bet. Ke mos kedo en Adar Alef? Muestros Hahamim disheron ke “Kuando entra Adar, ay de muchiguar la alegriya”, i esto se refere a los dos mezes de Adar...”
Keridos lektores, por siguro ke iva ser mas apropyado de azer este artikolo en Adar. Ma, vide unas, dos koensidesyas, komo por egzempyo, El mez de Ramazan ke estan kumpliendo muestros amigos i vizinos Muzulmanos. El teksto del Sr. Hatsvi se esta eskapando kon un kuentiziko, ke penso emplear en mi final. Esto supozando ke en meldandolo vash a remarkar i la sigunda koensidensya, el estado de sekura ke dayinda no mos eskabuyimos. İ, ken save?...Mos puedemos mizmo adjuntarmos a la suplikasyon i mozotros...:
“El 20 de Adar, una fyesta chika por onorar al Tsadik “Honi el Redondeador”, ke bivyo antes 1900 anyos i se pozava en tyempos de sekera, en el kampo. Kon su baston dezenyava una  rodancha (sirkolo) sovre la tyerra seka, yorando i suplikando al Dyo por luvyas: “Patron del mundo! De este sirkolo no me maneo asta ke akseptes mi rogativa de regalar luvyas al mundo!!..”
Keridos amigos, mas no tengo ke dezir, salvo: al vermos!...