Ver, saver, saver azer, azer saver”.
Gaston Leroux
En unos kuantos dias se fyestaran
los 60 anyos del ªalom... 60 anyos de lavoro, de lucha, i tambyen envezes (puede afitar) de diverjensyas de opinyon, de diskusyones, de esforsos para evitar la polemika en un grupo ande la amistad es la kondisyon prinsipal de egzistensya... 60 anyos de esperansa komo de anksyedad, durante loskualos los administradores komo los redaktores tuvyeron alternativamente momentos de imensa kontentez i tambyen de dubyo...
Kada martes en la sala de redaksyon: la efervesensya de las ultimas novedades a komunikar i a azer entrar en un espasyo limitado de papel, la responsabilidad de dever eskojer, la amargura de ser ovligado de eliminar por simple mankura de lugar... o envezes, sovre todo en los mezes de enverano ande el mundo parese entrar en un estado de medya letarjia, los chikos espasyos blankos a inchir syempre kon una eskrita suseptivle de interesar el lektor.
Aunke desde largos anyos absente de este mundo, la solombra de un ombre parese dominar kon sus dos emblemas: la una “a lo tuerto tuerto, a lo derecho derecho” la otra “un pasharo kon un ramo de olivo en la boka”. Saver dezir la verdad i azer la kritika menesteroza al momento oportuno todo en prezervando la Kerensya i la Armonia , los dos pilares ke sostyenen una institusyon.
Kon “sus Perashas ebdomaderyas”, “sus artikolos de fondo yenos de refleksyon”, “sus relatos de faktos ke akontesyeron prinsipalmente en Turkiya i muestra komunidad, ansi ke en el mundo djudyo”, kon “sus novedades sosyales i artistikas” , “sus referensyas al pasado i a las tradisyones laskualas son el eskeleto de la vida judia”, “sus pajinas sinematografikas i esportivas”, “su oja Judeo- Espanyola, una de las muy raras publikasyones semanales de este djenero, si no la unika”, tambyen kon “sus anunsyos de bodas i malorozamente de limunyos”, el ªalom a el solo konstitue una parte de los arshivos de muestra kolektividad.
En mizmo tyempo, kon su varyedad de temas i en mizmo tyempo la konstansya de varios sujetos propyos a la esensya mizma de una komunidad, el es komo una atadura, un djenero de ponte entre eya i munchas personas.
A parte su funksyon de transmisyon de novedades, un periodiko komunal tyene tambyen una valor afektiva .Despues un syerto tyempo, un kontakto sentimental se establese entre el i el lektor i esto es muy importante en muestra epoka de mundyalizasyon ande, munchas vezes, la persona se syente komo pedrida en un mundo kontinualmente en estado de movimyento.
Munchos de muestros amigos ke biven “por ahuera” lo asperan kada semana kon fervor i lo meldan de una punta a la otra... otros tambyen (ijos o inyetos de vyejos turkanos) los kualos no konosen la lingua de muetro payis , topan en la pajina Judeo- Espanyola un poko de lo ke les kontavan sus avuelos.
Ansi, kon la varyedad de sus redaktores ( aedados, madures o jovenes) i la diversidad de su pensamyento, el ªalom es virtualmente una sintezis del “Pasado, Prezente i Avenir” i tambyen, en syertos kavzos, komo una boz en la soledad de algunas kazas.
