Dora NİYEGOAlan Calman fue engrandesido kon los tres prensipos prinsipales de su padre, Alan Zalman ke era un operator selebre de Los Angeles en los anyos 1960s.
Alan fue un sportisto reushido en los anyos del lise. Kuando entro a la universitad, el se adreso al ekipo de futbol de la eskola ma, no lo akseptaron porke lo toparon muy flako i muy kurto por ser futbolisto. Alan se metyo al tino de azerse futbolisto, por esta razon, no renonso (vazgeçmedi) presto i kontinuo a insistir para ke lo tomen al ekipo. A la fin, reusho a entrar al ekipo de la universitad. Kada diya, estava azyendo sinko oras de egzersizos para pueder apanyar una buena pozisyon en el ekipo. Alan fue tanto laboriozo i tanto ambisiozo ke, en poko tiempo, reusho a entrar al primer ekipo de futbol de la universitad.
En el mes September 1965, todos los universitarios en Los Angeles estavan asperando a kuatro ojos el primer emportante mach de la sezon. Alan se fue a la eskola para ambezarse ke diya se iva djugar el mach. Ke ve? La data del mach estava kayendo el mezmo diya de Kippur, el diya el mas santo por los judyos. Alan se enkanto, ma no se dezespero presto. "Vamos a topar un remedio" disho de si para si.
Kuando avlo kon su padre, Zalman Claman ke simpre diziya "Tengo konfiensa en mi ijo. Todo modo de koza ke aze mi ijo, es bueno para mi", esta vez alevanto kavesa.
"No puedes djugar diya de Kippur" le disho a su ijo.
Ma el direktor tekniko del ekipo no estava de mezmo avizo kon Alan. "Si no djugas en este mach, vamos a tomar un muevo futbolisto en tu lugar".
"Padre, deshame ke djuge diya de Kippur. Te djuro ke va azer tanid. No kero pedrer esta pozisyon ke tanto peni para ganarla" le rogo Alan a su padre.
I ansi padre i ijo, se desidaron de yir al Rabbi, por tomar idea.
"No" les disho el Rabbi. "Todos los mansevos saven ke Alan es un futbolisto judyo. Este akto va ser un negro egzamplio por los mansevos de muestra komunidad".
Kuando oyo los biervos "negro egzamplio", Alan, de vista, se desido de no djugar diya de Kippur. El fue engrandesido kon el prensipo "La responsabilidad de kada judyo es de formar un buen egzamplio por los miembros de su komunidad".
Diya de Kippur, Alan se fue a la Sinagoga kon su famiya. Akeya noche, sus amigos le telefonaron i le disheron ke, en la radio, el prezantador del mach, estuvo repetando estos biervos durante el mach entero: "Alan Claman no esta djugando en este mach porke oy es la mas grande fiesta de los djudyos".
Alan estava muy alegre porke, siguramente, todos los mansevos judyos de su komunidad oyeron estos biervos en la radio. Komo el Rabbi les disho, este akto va ser un buen egzamplio por los mansevos judyos. Alan se sintyo, tambien gloriozo porke el reusho a ganar una viktoria moral.
Unos kuantos diyas duspues, el direktor tekniko del ekipo lo yamo i le disho ke kale ke torne atras porke tienen menester de el.
Un sierto tiempo duspues, en la pajina de sport de la gazeta Los Angeles Times, aviya un artikolo kon el titro "Alan Calman, el mas grande chiko futbolisto del ekipo de futbol de la universitad".
Anyos duspues, en una entrevista kon un periodisto (gazeteci), Alan estava dizyendo: "Me esto kreyendo ke el Dio me protejo durante mi kariera komo futbolisto porke no djugi akel diya de Kippur".
(Una memoria del futbolisto Alan Calman).
