El gizado de kinyentos anyos de los Sepharadis

Dora NİYEGO

Komo se puede azer una komida savroza sin empleyar ajo, pimyenta o pikante en el gizado?

Es muy naturel ke las komunidades ke biven endjuntos enriva del mezmo pais se enfluensen de uno al otro en todo modo de sujeto.
Ansi, en kinyentos anyos, el stil del gizado de los Sepharadis se enfluenso del pais ande bivyeron. Puedemos dizir ke el gizado de los Sepharadis Turkos, es un sentez de la kuzina de los Ottomanos i de la kuzina espanyola de kinyentos anyos antes. Segun un eskridor, mezmo el nombre “kasher” del kezo espesial ke merkamos de los marketes, es vinido del “kosher” de la relijion judiya. Al tiempo, el Grande Rabbinato metiya la stampa “kosher” enriva de estos kezos. I ansi, el nombre de este kezo se izo “kasher”.
Los Sepharadis ke emigraron a Israel de los paizes arabos, trusheron kon eyos la kultura de la kuzina de los arabos. El falafel, el humus, el kunefe i los kebabes ke se kome en Israel, son espesialidades arabas.
Los Sepharadis Turkos ajutaron a sus kuzinas las dolmas (legumbres inchidas de karne o de arroz), el borek echo de yufka i el arroz ke son espesialidades de los Ottomanos. Ma, la borreka (la pasta especial inchida de kezo, berendjena o patata), i las albondigas de pirasa son espesialidades de los Sepharadis, probablamente trayidas de la Espanya.
La kuzina de los Sepharadis Turkos es una kombinasion de legumbres, karne, gayina i pishkado, kozidos en kacherolas enriva la lumbre o en el orno.  Anyos antes, el kodrero  la vaka eran las karnes preferadas porke akeyos diyas, no aviya el penserio de kolesterol. Durante siglos, las resetas de komidas i las reglas de kuzina paso de madre a ija. La komida gizada i servida freska fue un faktor muy emportante de la kuzina sepharadi.
Los Sepharadis empleyavan lo mas la azete de oliva en sus komidas. La azete dura, la margarina (ke es la azete de los animales), nunka fue preferada. Al tiempo, todo modo de legumbre se gizava kon la azete de oliva. Oy, empleyamos lo mas, la azete de tornasol.
Komo la kozina kosher tiene sus reglas prinsipales, los Sepharadis preferaron de gizar komidas muy semples sin mesklar mil i una koza endjuntos. Muestras madres no teniyan menester de empleyar el ajo, la pimyenta, el pikante, las salsas o las kremas diferentes por ke la komida se aga mas savroza. La materiel prensipal de las komidas era los legumbres. Mil i una komida se gizava de la berendjena, de la tomat, de la kalavasa i de la espinaka. No aviya mezmo menester de rayer la sevoya i de tostarla en la azete antes de ajutar los legumbres. Echavan la sevoya entera i la kitavan duspues ke la komida se koziya. El un punyadiko de asukar ke se echava a las komidas ya abastava a darle la savor dulse. La asukar se empleyava lo mas, en las komidas de tomat porke la asukar ekilibre el asido de la tomat.
Es muy naturel ke en kinyentos anyos, el stil de gizado de los Sepharadis enfluenso la kuzina de los Ottomanos. Mezmo en las komidas saladas i agras, los Ottomanos se ambezaron de los Sepharadis a ajutar un punyado de asukar.
Probablamente las komidas de los Sepharadis de los paizes arabos sin muy diferentes de las muestras. Las diferentes hierbas, la pimiento, el pikante, el kimono ke dan una savor aromatika a las komidas son los alimentos del klima del Mediterraneo.
En los anyos dalkavo, en Israel, munchos Ashkenazis empesaron a preferar el gizado Sepharadi por modo ke es mas saludozo.
Para entender la kuzina judiya, kale saver la istoria de los judios. Mezmo oy, en Israel, ay mil i una manera de kuzina porke ay judios vinidos de diferentes partes del mundo. Kada komunidad se enfluenso de la otra, i ansi salyo en medyo una kultura komun en el gizado, komo en todos los otros sujetos.