Şeli GAONHeybeli es una isla yena de kazas kon guertas, de çayires, de kazinos, era antes anyos komo un kazal.
Coya DELEVİ
La Santa Biblia mos dize:(Num. (Bamidbar)- 29- 1) “...El primer diya del syeten mez selebraras una fyesta solemna...”Rosh Ashana...Es el empesijo del anyo Djudio. Ma, ay de demandarmos, deke el syeten mez i no el primer? Antes de topar repuesta a esta pregunta, kontinuaremos a meldar:”... En el dyezen diya de este mizmo syeten mez, umilyarash vuestras almas, no azerash dingun echo...” Yom Kippur..”... El kinzen diya del syeten mez, no azerash dinguna aktividad umilyante, durante syete diyas selebrarash una fyesta en la onor del Kriador..”La fyesta de Sukkot...
Aun ke el kalendaryo Djudio ampesa en Tishri, porke la ekspresyon “syeten mez”?? Porke la vida del puevlo Ebraiko ampeso kon la fin del “yugo” (boyunduruk) del esklavaje de Misraim, en el mez de NİSAN..(despues sigien İyar, Sivan, Tamuz, Av, Elul) i Tishri el 7. mez...La libertad es la baza de un puevlo, de una nasyon.
“Rosh Ashana, literalmente “ La kavesa del Anyo” es el diya de Djustisya. Akodraremos syempre este prinsipyo ke fue establesido por los Djudios, miles de anyos antes. “Libertad i Djustisya” son la baza, sin lakuala dinguna nasyon puede egzistir..”(*)
La primera semana de la anyada mueva ya se kompleto. Mos estamos aparejando para las fyestas de “Yom Kipur, Sukkot” i la alegriya de “Simhat Tora”. El anyo pasado aviya resivido un mesaje tratando de la realizasyon (o fabrikasyon) de la “SUKA”. Komo ya era kaji la fin de Los Moadim, me kontenti solo de meldarlo. Pensi ke no aviya sensyo de eskrivir sovre este sujeto, syendo ke la data de publikasyon iva ser despues las fyestas...
Oganyo me lo akodri, i lo meldi de muevo. Keridos amigos, devo atorgar ke es un teksto komplikado para mi. Kontyene ekspresyones i sitasyonas, komo dezir, etnikas, relijyozas. Yo, syempre me detuve de entrar en la ondor de estos sujetos, kuando depasan mis konosensyas. No me plaze tomar el risko de azer yerros...Aun kon todo, aserkandomos de Sukkot, pensi de relatar unos, dos paragrafos. Miri de adaptarlos kon mas simplisidad en el eskopo de ser byen entendidos:
“A la salida de Kipur, la mizma noche se ampesa la konstruksyon de la “Suka” para metermos imedyatamente debasho la proteksyon de esta “MİTZVA”...Es rekomendado de konstruirla si mizmo, i no kon el ayudo de otra persona. La Suka deve situarse en un lugar limpyo de muestra guerta o balkon. No deve ser a proksimidad de aguas suzyas o otras suzyedades. Es tambyen rekomendado de morar ayi durante los syete diyas de la fyesta de Sukkot, para konformarmos a la “Ordenansa” de la “TORA”. (Levitiko (Vayikra)- 23- 42.)
Despues esta sigiendo la manera de fabrikar la Suka, dando los detalyos los mas minimos, komo la kualidad i el djenero del materyal, sus mezuras, los entervalos entre kada pedaso ets...No penso mas alargar este sujeto syendo ke eskrivi tambyen en la oja de “Kavram” un artikolo ancho sovre Sukkot i Simhat Tora. A los ke meldan el Turko, les propozo de echar un ojiko! a akeya oja tambyen. En estos diyas Santos, rogaremos ke seya un anyo de salud, prosperidad , i lo mas importante, de repozo i paz en el mıundo entero. Amen...
(*)- Manadero anonimo
