Novedades... Novedades...

En Turkia, en Galata vyejo kuartyer djudyo oy konvertido en sentro komersyal, al deredor de la Torre de Djenova i a proksimidad del Muzeo del Kuinsentenaryo i de las prinsipales sinagogas de muestra sivdad, aktividades kulturales i etnikas fueron organizadas, konsertos de kantes liturjikos i de romansas, resitales de pyano i de varyos otros instrumentos, ekspozisyones de objektos de arte i igualmente de uzansa kotidyana ansi ke de fotografias, kualas istorikas, kualas artistikas, konferensyas, lektura de poemas, projeksyon sinematografika de fragmentos de lo ke era la vida djudia, etc..etc...
Un retorno al pasado i sovre todo la alegria de toparsen todos reunidos, un plato de komidas sefardies en la mano, kada uno kon un recuerdo i la immensa nostaljia de un tyempo ke no kere nunka despareser de muestra memorya.

Tres muevas bodas alegraron la Sinagoga Neve Şalom
Tres muevas bodas, tres mansevas i tres mansevos en el portal de una larga vida de kerrensya, solidaridad, responsabilidad, avenimyento, kontentes i azlaha.
Alhad el 2 del mez de septembre:
“Edna” ija de Mazalto & Yasef Gözcü
“Musa” ijo de Fortüne & Izak Müğrabi
“Seren”
ija de Diyamante i Mordo Kumrulukuş Prezidente de la Komunita de Göstepe i “İzzet” ijo de Lüsi & Yasef Menase
“Aylin”
ija de Klara & Albert Veleli i “Isel” ijo de Reyna Bahar
adjuntaron sus destinos en la alegria para una unyon echa de amor. Paz i armonia.
El Dyo ke los bendiga.
Todas muestras felisitasyones a las famiyas Gözcü/Muğrabi, Kumrulukuş/Menase, Veleli/Bahar, bueno ke veyan syempre en sus ijos.

Un Ijo nasyo en las Famiyas Penso i Abudara
Un ijo nombrado “Ilay Erol Penso” nasyo para una larga vida venturoza i prospera echa de Logro, Gozo, Armonia i Azlaha, primer fruto de la unyon de Yelda i Niso Penso.
Ke su venida trayga la Paz i la Amistad en el mundo i ke sus avuelos “Sara & Robert Abudara”, konsejero del Gran Rabbino i “Sara & Erol Penso” lo veygan durante largos i largos anyos.
Todas muestras felisitasyones i muestros mijores dezeos a las famiyas Abudara i Penso.