Klara PERAHYAAy de esto 21 anyos, la komunidad de Estambol se topo frente kon frente kon el terrorizmo de esensya rasista....Fue la primera vez en muestro payis ke ombres i mujeres, ijos i ijas yoraron por un marido, un padre o un ermano matado en un lugar de orasyon... la primera vez ke, al nombre de la relijyon, sangre de inosentes profano el marbolo puro de una sinagoga...
Vos transmetemos kon grande plazer, debasho de estas linyas, la letra ke muestro amigo Moiz Tastasa mos mando ay unos kuantos dias, ke aze el elojyo de la revista “El AMANESER” suplemento de muestra Gazeta, kreado por Karen Gerson- Şarhon kon el ayudo de Güler Orgun, i tambyen del poeta Vitali Sedaka de Montreal i del eskritor bushkador Dr. Gad Nassi de Israel
Moiz TASTASA
(tekstualmente)
Muy keridos lektores,
Es kon grande satisfaksyon ke desde 2- 3 anyos, meldamos “El Amaneser” editado enteramente en lingua Ladino, suplemento mensual de nuestro uniko semanal ŞALOM, el kual es la boz de los Djudyos de Turkia.
Es grasyas a los esforsos ke azen munchos eskritores de todo modo de paises ke el es publikado i nozotros ke semoz oy aedados enriva de 50- 60- 70 anyos lo puedemos meldar i entenderlo kompletamente.
Nuestro buto es de no deshar olvidar la lingua de nuestros avuelos. Yo, de mi parte, lo meldo kon grande atensyon porke topo seya munchas eskritas de lo pasado seya syertas otras byen enteresantes de las kualas kale tomar egzemplo. Una de estas notisyas fue la de H.Vitali Sedaka de Montreal ,entitolada “Un dezeyo de padre” ke devemos tomar en konsiderasyon por el avenir.
Tambyen meldi kon grande entereso una otra eskrita del Dr. Gad Nassi de Herzeliya, entitoloda eya: “La armada sekreta de David Reubeni” en la kuala pasan los nombres de Shlomo Molho partyendo del Portugal i indose a Salonika i su enkontro en el anyo 1527 kon los rabinos ke estudyavan la Kabala . Entre eyos el uno se yamava Yosef Karo i el segundo Yosef Taitasah...
Atras munchos anyos en muestra vyeja eskola de Hasköy ke oy es el “Ihtiyarlar Yardım Derneği” avia un direktor nombrado Nesim Hekim. Kuando mos ivamos aya azer la tefila de Shabat, el me dizia syempre “Moshe Taitasah” i yo respondia no es Taitasah ma Tastasa i riiamos...
Es el ke tenia razon, el konosia la Kabala, ma mozotros no lo entendiamos.
En meldando la eskrita de Gad Nassi me rendi kuento de la koza i me ambezi de ande vyene la alkunya “Tastasa”.
Agradesko el sinyor Nasi ansi ke todos los eskritores ke luchan para azer arrebivir i no deshar olvidar la lingua de muestros avuelos i en este objetivı me syento gloryozo de azer parte kon todos vozotros.
