Seremonia grandioza en prezensya de todos los dirijentes de Turkia i de una grande asistensya de notavles, ande fue onorado un myembro muy valorozo de muestra komunidad, syempre pronto a ayudar, dinamiko aunke aedado de 82 anyos, pozitivo, realizador de grandes proyektos.
Ombre de una moralidad i sagasidad sin falta, simple en su aktitud, ekitavle en sus djuzgamyentos, Jak Kamhi supo konkuistar la estima i la apresyasyon de los mas grandes komo de los mas modestos.
Entre varios myembros de muestra komunidad ke asistyeron a la seremonia i akompanyaron el Gran Rabbino Rav Izak Haleva i su konsorte Rejin Haleva, eran prezentes: Lika i Silvyo Ovadya Prezidente de la komunidad Djudia, ansi ke Süzet i Sami Herman vice Prezidente, Lina Filiba, Robert i Sara Abudaram, Avi Alkaş, Elyo Behmuaras, Şeyla i Jozef Nasi Prezidente del Neve Şalom Vakfı, Doli i el Avokato Rifat Saban, el Avokato Yakup Barokas Koordinador de la Gazeta Şalom, ansi ke Naim Güleryüz Vice- Prezidente de la “Fundasyon del Kuinsentenaryo”, ko- fundador i Konservador del “Muzeo Djudyo” de muestra sivdad, i tambyen primer Kolavorador de Jak Kamhi en estos dos kampos. .
Tuve la okazyon de tener en mano los tekstos de las avlas del Prezidente Ahmet Necdet Sezer i de Jak Kamhi i me ago un plazer de darvos una chika idea de syertos pasajes:
a) (del diskorso del prezidente Ahmet Necdet Sezer)
“ ......Jak Kamhi ke es el prezidente de la Fundasyon del Kuinsentenaryo (la kuala konta el esprito de benevolensya i de toleransya del puevlo Turko) kontribuo muncho a azer byen konoser muestro payis al mundo entero.
Su lavoro personal ansi ke la aktividad de la “Fundasyon del Kuinsentenaryo” tuvyeron una grande influensa en el fakto kel anyo 1995 fue eskojido “Anyo de la toleransya”.
De mezmo, el “Muzeo de los Djudyos de Turkia” ke fue fundado grasyas a los esforsos de la Fundasyon del Kuinsentenaryo, revela i mete en evidensya el esprito de solidaridad i de ermandad del Puevlo Turko.....”.
b) (de la repuesta de Jak Kamhi)
“.....Mi vida politika empeso kuando tuve la idea de profitar de kada okazyon ke se prezentava a mi, para azer konoser afuera de Turkia la verdadera valor i la vizyon de mi Pais. Servir su patria es el dever de kada sitizano.
El prinsipyo de baza de Atatürk, Fundador de muestra Republika, era: “Paz en el pais, Paz en el mundo” Esto fue una fuente de inspirasyon en mi lavoro de los ultimos 30 anyos.
De mezmo los Estados Unidos de Amerika, Israel i la Komunidad Evropea lavoran tambyen en este senso.......”(fin de sitasyon) etc...etc..
Ke alegria i ke onor para muestra komunidad de kontar entre sus myembros, una personalidad de una tala valor i de ver su merito djustamente rekonosido por los dirijentes de muestro Pais.
