El omenaje fue unanimo vyernes el 10 Agosto, konsernando la eksepsyonal personalidad del grande Prelado Jean Marie (Aron) Lustiger, munchas vezes sovrenombrado “el Kardinal Djudyo”
“El mundo Kristyano pyedro una de sus mas grandes myembros, la Fransya una grande figura, i el mundo Djudyo uno de sus mas serkanos amigos” disho el reprezentante del Kongreso Djudyo Mundyal.
A su torno, Daniel Shek Embashador de Israel en Fransya afirmo kel Kardinal Lustiger kon su umanizmo i su fuersa de konviksyon okupo syempre un grande lugar en el korason del puevlo Israelyano.
El kotidyan? Haaretz , de su parte, eskrivyo en el senso sigyente: “La fey de Lustiger kedo kompleksa asta el dia de su muerte. El no nyego ni arrondjo nunka su identidad Djudia (su madre muryo en Auschwitz). El lavoro syempre a kurar las multiples yagas i feridas ke uvo durante siglos entre Djudyos i Katolikos. El demando ke su funeral inklue las dos Feyes”
Ansi, konformamente a la propya voluntad del Defundo ,vyernes el 10 Agosto, la seremonia funerarya empeso kon “ el Kaddish” pronunsyado por su primo Arno Lustiger ( djudyo Ashkenaz) , en el portal de la Katedral “ NOTRE DAME “ de Paris.
Entre las multiples personalidades ke asistyeron al funeral, el Prezidente Nicholas Sarkozy ke interrumpyo por un dia su viaje en los Estados Unidos, el Primer Ministro i todos los myembros del Governo Fransez ansi ke munchos reprezentantes de varias Komunidades Djudias , Fransezas komo internasyonales.
Sovre el plano de sus relasyones kon el Judaizmo, segun lo ke topimos en muestras investigasyones, tres de los grandes momentos de su episkopado fueron :
a) El 9 Agosto 1982, a la sigida del atentado de “la rue des Rosiers” , (aunke la Komunidad Djudia Franseza era a esta epoka muy retisente enverso el) Mgr Aaron Jean Marie Lustiger interrumpyo immedyatamente sus vakansas en Almanya i retorno a Paris para asistir a la seremonia de dolyo ke tuvo lugar en la Sinagoga. Entonses la asistensya lo aplodyo a la salida, malgrado sus rezervas doktrinales konsernando la doble identidad Djudia i Kristyana del Prelado.
b) Su lavoro intensivo en 1987, para arreglar el problema de la prezensya, en Auschwitz, de un konvento de “Karmelitas Polonezas” ke avian metido una grande Kruz (haç) delantre la barraka ande moravan, komo si eyas kerian apropriarsen el dolyo djudyo, lo ke kavzo la revolta del Djudaizmo Mundyal , el kual konsidero este akto komo una agresyon echa a su Fey i a su Dolor.
c) El fakto de aver sido, en septembre 1997, uno de los inspiradores del “Akto de Arrepentimyento de los Relijyozos Fransezes por todo lo ke se produzyo durante la Shoah”. akto muy simboliko realizado en Drancy, sivdad ke fue entre 1940 i 1945 un lugar de kolavorasyon intensa entre las otoridades de Vichy i el okupante Nazi i ande miles i miles de Djudyos fueron enserrados en kampos de konsentrasyon debasho el kontrol de la polisia Franseza , asperando de ser deportados verso los kampos de la muerte.
En desparte de esto, konsejero del Papa Jean Paul II, el Kardinal lo apoyo de toda su fuersa kuando el shefe del Vatikano le anunsyo su intisyon de azer el mizmo(al nombre de la Eglisya) “Akto de Arrepentimyento”. El fue uno de los prinsipales ovreros del sukseso del viaje Papal a Yerushalayim en 2000.
Ansi, el fue un pionaryo de la intensifikasyon de las relasyones entre el mundo Djudyo i el Sentro del Katolisizmo. El syempre se esforso de krear pontes entre Djudyos i Kristyanos
Uno de los grandes eskopos de la vida ekleziastika del Kardinal Lustiger fue el aserkamyento entre “la Fey Djudia” i “el Kristyanizmo” ke el konsidero syempre komo una kontinuasyon i un kumplimyento del primer Portanto el resivyo munchas vezes kritikas amargas de la parte de sus kolegas kristyanos komo de sus ermanos Djudyos. El pensador rabbiniko byen konosido “Josy Eisenberg” kontesto kon vehemensya la idea de konsiderar el Kristyanizmo komo una kontinuasyon i un kumplimyento del Judaizmo, i Elie Wiesel no pudo nunka eskonder la difikultad ke el resentia en prezensya del Kardinal, lo ke el eksplikava de la manera sigyente: “ El Djudyo ke ay en mi se syente triste delantre del Djudyo ke ay en el”.
Por kontra las relasyones del Prelado kon los myembros de la Ortodoksia Djudia Amerikana eran bastante amigavles.
De su parte, el Gran Rabbino de Fransya Joseph Sitruk konfirmo el immenso rolo del “Kardinal” en la mueva dimensyon de respekto mutual i de konsiderasyon resiproka ke el kreo en el dialogo entre las dos relijyones.
“Mi rekuerdo el mas emosyonante (adjunto el gran Rabbino Sitruk) es mi ultimo enkontro kon el Kardinal, durante el kual el me reafirmo ke nunka renyego el Djudaizmo i ke syempre kedo Aaron todo en syendo el Kardinal Lustiger”. ...
Puedemos puede ser konkluir ke malgrado su kompleksidad , kon su rikeza espiritual i sentimental , el Kardinal Aron Jean Marie Lustiger fue una de las figuras las mas briyantes de muestra epoka , puede ser mizmo el simbolo de una posibilidad fundamental de ermandad entre los umanos, kada uno kon sus kreensas i malgrado todo lo ke desferensya un individuo de un otro.
