Las Vistesh?
Klara PERAHYALas Vakas de Nişantaşı, las vitesh? Por seguro si... Verdadera invazyon de la rasa bovina... kada una de kolor i de materyal diferentete... kualas ruvyas, kualas brunas... la una echa de fragmetos de espejo briyando a las mil luzes, otras pintadas en blu, preto, kolorado o amariyo, syertas emplateadas o endoradas, kon sapatos o fustanelas...
una en pyes, otra achunkada sovre la pyedra, ma las otras kaji en totalidad sovre sus kuatro “pyernas”, komo venidas de un mundo diferente, un mundo ke puede ser no egzistyo nunka o ke pedrimos por syempre... manko ruidozo, mas kalmo...
Envezes sovre las unas desenes de kolores a kolores, flores, korasones o linyas en zigzag komo un lenguaje deskonosido propyo a un lugar ande ningun umano puedra ayegar... kolores klaras, luminozas, ma tambyen envezes eskuras...raramente una palavra eskrita... solo sovre una de entre eyas, mi mirada pudo deskuvrir el byervo “afrika”.
Ke kijo dizir el pintor? Por seguro ke una palavra no tyene solo una sola sinyifikasyon i mizmo si la tyene, ay todo lo ke el ke la dize adjunta i tambyen el ke la melda o la oye.
No se si estas beemod son mas djenerozas ke los ombres, ma por seguro manko kalkuladoras, manko egzijentes, mas sotometidas a las leyes munchas vezes duras de la natura.
Es ke es el mundo ke troko en su morfolojia, su ritmo, su mentalidad? o byen el benadam en su mentalidad i su egosentrizmo sin fin ni atemo?...
Kada una de estas vakas, en los desenes ke yeva sovre eya, su postura, su kolor ets... parese ser un mensaje, puede ser una kestyon... o byen una yamada ,un avizo, mizmo una amenaza.
A los pyezes de la una, sovre un chiko pedaso de karton estava eskrito... “Ot yok, süt yok” (No yerva, no leche)... sovre otras: “dikkat insan çikabilir” (atensyon’ puede salir ombre), “inek deyip geçme” (no pases, kontentandote de dezir ‘una vaka’) etc... etc....
Grito de dezesperansa o de advertisimyento ke vizivlemente no estamos ainda prontos a oir, mozotros los umanos.
Mozotros ke en muestro orgolyo loko, keremos todo destruir para todo rekrear... mozotros ke no savemos kontentarmos de nada, mozotros para ken “una reushita no es un logro ma un muevo dezeo sin senso a kerer de muevo satifazer”, mozotros ke, en muestro egoizmo, mos olvidimas ke no se puede nada derrokar sin impunidad, ke mos olvidimos sovre todo lo ke es reelmente bivir, gozar, riir o ayudar sin nada asperar de retorno.
