Novedades... Novedades...

60 anyos de un duro lavoro de esforsos i imajinasyon, kumplido al prinsipyo por su fundador i a la sigida de su muerte por todos los ke asta agora penaron i ainda penan para ke no despareska esta  boz de muestra Komunidad.
Lunes, los myembros del Konsilyo administrativo de la gazeta ansi ke los sinyores Mois Tastasa i Moşe Grosman fueron al lado de su tumba por una mueva orasyon i  un muevo omenaje.
Paz i serenidad en Ganeden a Avram Leon, i vidas largas al Şalom.

İnisyativa de Paz apoyada por la Liga Araba
Segun el kotidyano elektroniko “Le Monde”, la semana pasada, los Ministros del Eksteryor de Ayifto i de la Jordania enkontraron Ehud Olmert, en Yerushalayim mizmo,  para  prezentarle una “ Inisyativa de Paz” sostenida por la Liga Araba.
Este proyekto de Paz propoza un rekonosimyeto  del Estado Israelyano , de la parte de todos los Payizes Arabos , en kambyo de: 1) un retiro total de Israel de todos los territoryos konkuistados durante la ”Gerra de 6 dias” 2) la kreasyon de un Estado palestinyano  3) una solusyon djusta de la kestyon de los refujyados Palestinyanos. Olmert, de su parte, propozo diskusyones kon los palestinyanos al sujeto de un akordo de prinsipyo ke permetera el establesimyento de un Estado sovre 90 por syen de los territoryos palestinyanos.
Mark Regev  porta-voz (sözcü) del Ministeryo del Eksteryor Israelyano disho ke esta vijita de los dos Diplomatos Arabos es un “Evenemento Istoriko” , visto ke es la primera vez ke una delegasyon  rekonosida por la Liga Araba vyene a Israel.

Dos ermozas bodas avyeron una perioda de alegria
Alhad el 29 Julyo, despues de un intervalo de tyempo dedikado a la reminisensya del Pasado,  la Sinagoga Neve Şalom resplandesyo de muevo de mil luzes... luzes de Buen Siman, luzes de Alegria i de Prosperidad.
Sibel  ija de Ester & Yako Romano  i Yusuf ijo de Roza Kohen.
Sarita ija de Röne & Eli Kohen  i Erol ijo de Meyzi i Davit Elhadef aunaron sus destinos para una larga vida yena de rizas, gozos, amor i armonia.
Muestras sinseras felisitasyones a las famiyas Romano/Kohen, ansi ke Kohen/Elhadef i muestros mijores dezeos de opulensya i azlaha a los rezin kazados.

Muevo Ayudo Finasyer de los Estados Unidos a Israel
Segun lo ke meldimos en el kotidyano elektroniko “Le Nouvel Observateur”, el primer Ministro Israelyano Ehoud Olmert anunsyo Alhad el 29/7 ke los Estados Unidos van a pujar de 25 por syen el ayudo militaryo a Israel
Los Estados Unidos se estan tambyen aparejando a anunsyar una serie de kontratos de armamyento kon la Arabia Saudi i sinko payizes Arabos del Golfo, en vista de  enforteserlos i luchar ansi kontra la influensa kresente del Iran.