Kadima Lideri ve İsrail Başbakanı Ehud Olmert, Kudüs`teki evinde partisinin üst düzey yöneticileriyle yaptığı toplantıda, Kadima`nın önümüzdeki birkaç sene daha İsrail`i yönetmeye devam edeceğini ve kendisinin başbakan olarak kalacağını söyledi.
Klara Perahya
Kualo es el mundo judyo ? para los ajenos, una entidad abstrakta, sin simbultura ni semejansa.... Para mozotros una prezensya munchas vezes sin facha ni silueta ma ke mos es serkana, kaji sakra, una prezensya impalpavle de lakuala asumamos kada problema, sentimos kada dolor, mos glorifikamos de kada performansya..
Todo mos interesa kuando se trata de el, sus viktoryas sus desfechas, sus dezeos, sus aspirasyones, lo ke kada uno de entre sus myembros aze en vida, i kualo keda despues de su muerte. Es la razon por la kuala rekoji en este chiko artikolo tres novelas ke mos tokan de serka o de leshos.
A) Ay kaji dos semanas pedrimos André Chouraqui aedado de 89 anyos. Grande eskritor i muy grande pensador djudyo, intelektual i en mizmo tyempo ombre de aksyon; el fue entre 1959 i 1963, el konsejero de David Bengourion fundador del Estado de Israel i despues fue nominado vice governador de Yerushalayim al lado de Teddy Kollek desde 1965 asta 1973.
En desparte de sus funksyones politikas, el era Doktor en “Derecho İnternasyonal”, i toda su vida fue konsagrada a la realizasyon de un ideal de Justisya, Paz i Armonia.
Nasido en 1917 en Algeria en un kazal ande bivian Arabos, Judyos i Kristyanos., atakado a la edad de 7 anyos por una terrivle kriza de “poliomyelite” ke lo ovligo a luchar por su vida, el entendyo la inapresyavle valor de la komunikasyon i del ayudo mutual i ansi un konsideravle potensyal de enerjia se desvelopo en el, el kual le permetyo de gerreyar por un ideal de kooperasyon entre los umanos, mizmo si al prinsipyo esto puede pareser utopiko.
Entre mas de 40 ovras literaryas i historikas, el mos desho la traduksyon en lingua franseza de la Biblia, endjunto kon la del Muevo Testamento i del Koran, Ovra kolosal, verdadero Monumento de Umanismo i Okumenizmo, Mesaje de amistad i avenimyento.
B) Vyernes pasado el 20 del mez koryente, el primer konvoy de prizyoneros liberados por Israel ayego en el Estado Palestinyano de Sisjordania. El resivo fue kayente i la alegria muy grande. Djesto de una importansa krusyal de la parte de Israel, puede ser primer paso real verso la paz.. Kon komprensyon mutual, voluntad i byen kerer, lo ke parese ser una utopia puede trokar en realidad.
C) En Paris, verso la fin de la semana pasada, fue komemorado el 65en aniversaryo de la terrivle desgrasya del “Vel d’hiv.”, durante la kuala en Fransya 13000 Judyos avian sido arrestados i deportados por la polisia Franseza eya mizma.
Komo lo avia echo el Prezidente Chirac en su tyempo, el Prezidente aktual Nicholas Sarchozy i el Primer Ministro François Fillon pronunsyaron, kada uno de su parte, diskorsos rekonosyendo la kulpabilidad i la responsabilidad de la Fransya en esta sirkunstansya i yamando la mansevez a ser syempre vijilente afin ke nunka nunka esto no se repete mas.
Es todos endjuntos ke devemos luchar en este skopo, afin ke ningun umano, kualas ke sean sus kreensas, no sea molestado en su karne ni menospresyado en su dinyita... afin ke kada Uno aksepte el Otro en su “ser propyo” i su diferensya.
