Me permeto de intervenir a este sujeto. Si, es verdad, su ermano tuvo graves problemas kon la Justisya en el anyo 2001 i el fue djuzgado i kondenado a tres anyos de prezo. Esto no amenguo ni amengua el merito de su ermana i no la empidyo de ayegar a uno de los mas altos postos de la politika Franseza.
Ija de un ovrero de orijen Marokana, Rachida Dati no manifesto nunka su revolta delantre las inigualidades del destino en rompyendo, kemando o destruyendo, ma en arremangandose las mangas i lavorando.
Djesto sublime de los ke, undidos en las difikultades, persisten a kerer salir personalmente de la medyokrita, a la sudor de sus propya frente, sin pedrer tyempo en vanas lamentasyones.
İntelijente, korajoza, muy laboryoza, perseverante en sus esforsos, eya izo estudyos briyantes i pudo ansi ayegar, a la edad de kuarenta anyos, al mas alto grado de la majistratura Franseza.
Nikola Sarkozy disho lo sigyente a su sujeto:
Rachida Dati tyene la ovligasyon de reushir porke su prezensya es un mensaje de enkorajamyento a todas las kreaturas de Fransya. Grasyas a su merito, grasyas a su engajamyento esto devyene posivle
Si, Muzulmana, ija de una famiya de emigrantes, Rachida Dati es en este momento una figura amblematika no solo en Fransya ma en el universo entero i partikularmente en esta fraksyon desfavorizada de la umanidad, ekonomikamente muy flaka, ke mora en los foburgos al entorno de las grandes sivdades .
Sin nunka nada renyegar de su orijen, syempre fidel enverso los suyos, eya supo afirmar su identidad i azerse un lugar en la mas alta esfera de la administrasyon de su payis
Rachida Dati es, oy en dia, no solo un egzemplo ma tambyen una immensa esperansa para la manseves. Eya es la prova ke no ay una fatalidad invensivle, ma solo difikultades ke kale afrontar kon koraje ,sin espanto ni ezitasyon.
Por seguro eya enkontrara ainda munchos entrompesos sovre su kamino; espero ke va pueder venserlos todos, ma desdichadamente nada es seguro; la vida no es nunka uniforme, syempre tortuoza. La sola koza importante es de nunka kapitular, nunka demisyonar.
No es solo para los viktoryozos kel orizente es luminozo ma tambyen para todos los ke saven luchar por sus ideal.
