Segun el kotidyano elektroniko “Le Monde” de Alhad pasado, las Otoridades Israelyanas anunsyaron ke (segun un akordo kon el muevo governo palestinyano de Sisjordania ) Israel renunsyara a persigir 189 aktivistos atados al Fatah, a la kondisyon ekspresa de engajarsen a no perpetrar, en el futuro, ningun akto de terrorizmo kontra Israel.
Esta desizyon fue tomada en el buto de apoyar i ayudar el prezidente “Mahmoud Abbas” en el establesimyento del muevo Estado Palestinyano
La lista komprende aktivistos de las brigadas de los“ Martiryos de Al- Aqsa”, ramo armado del Fatah i del OLP..Ningun aktivisto del Hamas no aze parte de este grupo.
El Ministro Palestinyano del Interyor Abdel Razzak Yahya deklaro alhad la noche en Ramallah, ke Mahmoud Abbas prezentara a Olmert un dokumento en este senso, sinyado por estos mizmos aktivistos.
De otra parte, segun el kotidyano elektroniko “Le Monde” de Lunes, Israel afirmo aver permetido el retorno en la Sisjordania okupada, del kapo del Fronte Demokratiko de Liberasyon de la Palestina (FDLP) instalado en Damas i de Farouk Kaddoumi, dirijente egzilado en Tunizia, afin ke puedan asistir myerkoles al Konsilyo Lejislativo de esta Organizasyon, la kuala es un djenero de Parlamento interno del OLP.
