Dora NİYEGODiya de Shabat, el 23 de Junio, uvo una grande seremonia en la Sinagoga Hemdat Israel de Kadikoy por onorar el profesor Dr. Yomtov Garti. Los amigos, los elevos, los parientes del profesor asistieron a esta seremonia. Akel diya era en mezmo tiempo ‘El diya de los Kadikoylus`, por esta razon, las dos okasiones fueron selebradas en mezmo tiempo.
Şeli GAON
Antes dos semanas 44 dammas volontaryas de una organizasyon, mos fuimos a pasar el dia a un kampo entornado de vedruras.
Un lugar maraviyozo en medyo la natura; serka de Sarıyer.
Una guerta ordenada; entornada de flores i arvoles; de todo mado de kolores, las mezas kon manteles blankos i las siyas blankas, en medyo de las mezas un vazo de rozas, enbasho enriva la tyerra kavesales grandes para repozar, en un kanton una kuna de kuedra, todo muy limpyo i kalmo.
El derredor (ortam) repozado para ke una persona se pueda kalmar i deskansarse el meyoyo i el puerpo de todos los problemes ke tyene.
Kuanda arivimos verso onze i medya las dirijentes de este paseo mos afrieron kafe kon dulsurya i todos; grupos de 4- 6 personas avlimos, mos riyimos I mos asentimos endjuntos para pueder konversar.
Teniyamos entre mozotros dos amiga psikologas ke mos izyeron pasar el tyempo de una manera edukativa sin atagantandomos (sıkmadan).
Fue un dia de terapi para mozotros.
En primero; mos yamaron a todos para azer un serklo redondo de kerensya las 44 mujeres, i despues izimos grupos de 4 personas; para kantar kantikas de muestra chikes en kualker lingua para akodrarmos de muestra chikes.
Los grupos kada uno kon rango kantaron en baylando i aboltandosen. Dike paresiya una mestra ande se topara chikos de 6- 7 anyos.
El buto de las psikologas era de azermos pasar unas kuantas oras nostaljikas; en konosyendomos mas muncha unas kon las otras; azyendo djugos endjuntos.
A midi el komer reushido mos dyo plazer. Todo lo ke komimos muy savrozo i muy byen organizado.
Despues ke era la ora de azer siesta; mos yamaron a todas para azer de muevo un serklo; i delantre de kada una teniyamos unas piedras grandes ande estava eskrito debasho byervos; de amistad, tolerensya, solidaridad i munchas otras kozas.
La dirigente mos disho de tomar kada una la piedra ke tenemos delantre de mozotros i mirar lo ke esta eskrito.
Mos dyo vente puntos para pensar i desinar lo ke estamos entendyendo de este byervo u byen de eskrivir sovre el byervo i lo ke sentimos.
A la fin moz izo grupos de 4- 5 persones i mos demando de azer, mostrar a las otras amigas un monumento kon los byervos del grupo.
Mozotros teniyamos los byervos; pasensya, armoniya, dinamizmo i la unyon. En eksplikando a las otras la sinyifikasyon; realizimos un monumento enteresante.
La amiga d’el dinamizmo alevanto los brasos al syelo; un pye de detras, el otro de delantre para dar el sentimyenta de una pyerna; i la armonia de la otra; i otras la amiga ke era la unyon, en pyes los brasos avyertos, mos auno a todas.
Aviya byervos diferentes; komo la realitad, fraternitad, la luz, la enerjia pozitiva, el akordo, la ermandad, la amor, la sanedad, la kontentes, la kapachidad i otros.
La idea fondamental de todo lo ke vos konti es; ke la sanedad de la persona es lo mas emportante en la vida.
Kuando una persona es sana; puede azer todo lo ke kere i dezea.
La kerensya, la armonia, la amor del den frente i son los prensipyos emportantes para azer amigable i kontinuar las relasyones kon los ajenos.
Kale akseptar a todos kon lo ke tyene de bueno i de negro; asegun es.
Kale ver lo ke tyenen de pozitivo para pueder kontinuar. Para esto se kere pasensya i buena intisyon.
Kuando la persona pensa a lo negro, no ay fin; todo se le ve ariskuro i sin olusyon.
Kale tener buenas ideas, pensar a todo modo de bueno, para ke se aga todo bueno.
Del nasimyento de una persona fina la muerte ay munchos detenimyentos (engel) en la vida. Para pueder venser las difikultades; kale ser fuertes, ensistir en todo modo de koza para reushir.
A la fin de un esforso, de un lavoro se puede kreer el amigable (dostluk). Este dia fue muy reushido para kreer las relasyones senseras entre todo las mujeres sin kondisyon (koşulsuz).
Todas kon todas endjuntos, kon entimidad i kerensya.
Valyo la pena ke asisti a este dia inolvidavle; i espero ke van a repetar estas okazyones; para estar en komunikasyon kon todas; en todo modo de evenementos.
