Klara PERAHYA
Ay de esto unas kuantas semanas tuve el grande plazer de enkontrar Eli Meriç prezidente i Beki Çiprut vice prezidente de la Michne Tora . Tuvimos una grande konversasyon sovre diferentes sujetos, entre otros las aktividades aktuales de la ovra, sus proyetos en el buto de anchear sus kampos de lavoro i sus profundas aspirasyones de kontribuir al maraviyozo esforso ke se aze aktualmente afin de azer de una manseves envezes en difikultad “personas byen armadas para la vida”.
Esto fue syempre el objetivo de la Michne Tora, ayudar a azer avansar los ke seran los ombres i mujeres de amanyana, azer de eyos myembros kompetentes i utiles de muestra komunidad i darles el maximum de shans para reushir.
A la sigida de esta konversasyon, pensi muncho a eyos, a sus entuzyasmo i sus ideas progresistas yenas en mizmo tyempo de idealizmo i realizmo. Tuve la impresyon de toparme no solo delantre un prezidente i una vice prezidente ma delantre un padre i una madre.
Por seguro ya tenemos, bendicho el Dyo, la eskola de anyo en anyo mas performante grasyas a la ekselente kualidad de su korpus ensenyante komo a su programa de desvelopamyento i varias aktividades intelektuales aditivas: “konkorsos intelektuales”, “okupasyones artistikas i esportivas” , “ viajes edukativos” etc...etc...
Ay reelmente en muestra komunidad el dezeo perpetual de pushar asta el ekstremo limite de sus propyo potensyal, los elevos ke se engrandesen en un entorno ekonomikamente en difikultad.
El lavoro es muy difisil . Un grande gazetero i pensador Fansez (Jean Servan Schreiber si no me yerro) avia dicho aproksimativamente lo sigyente: “La inegualidad sosyal es una koza muy difisil a venser ... Mizmo kuando a la edad de 6 anyos, el ijo del injenyor i el ijo del ovrero se topan en la mizma eskola, kon las mizmas posibilidades i los mizmos instrumentos de desvelopamyento, eyos kedan syempre en un estado de inegualidad..”
El fakto es ke (grasyas a las kondisyones pozitivas de su prima chikez , sujetos de konversasyon tratados en su kaza, viajes i paseos echos kon sus jenitores, vokabularyo relativamente riko oyido en su entorno) el primer , el ijo del universitaryo empesa sus primeros estudyos kon un syerto bagaje kultural en la memorya, por seguro konfuzo ma egzistyente...
El otro, el ijo del chiko esnaf o mezadero, evolua en una atmosfera ande las preokupasyones ekonomikas primen todo, ande se trata prinsipalmente de asegurar los menesteres primordiales de la kaza i de estabilizar un budjeto syempre insertano.
Es djustamente de semblavles estudyantes ke se okupa espesyalmente la Michne Tora, afin de darles la posivilidad de romper el sirkulo visyozo ande eyos se topan envezes enserrados.
El objetivo prinsipal de su programa es la partisipasyon a bekas(burs) de estudyo, lesyones partikolares de enfortesimyento eskolaryo, korsos de preparasyon a los egzamenes de admisyon a las universidades i sovre todo un grande kudyo i apoyo moral de la parte de kada myembro, lo ke asegura ainda mas el arrezyamyento de todas las adkizisyones .
Bendicha Ovra, bendicha Komunidad ke la muestra.
