Gerreador entuzyasto desde los tyempos leshanos ande despues la muerte de su madre (una de las raras personas kon la kuala el avlava el Judeo- Espanyol) Hayim Vidal Sefiha sintyo el menester de dar de muevo no solo vida ma sovre todo dinyidad a este idyoma desdenyado por kaji todos, i el lo izo.
Gerreador infatigavle, el kijo de mezmo salvar la memorya de sus ermanos Sefardis de Salonika o otras partes del mundo, ke pyedreron la vida en los kampos de la muerte nazis i ay de esto unos kuantos anyos, el lucho kon tenasidad para ke una laja de komemorasyon en Judeo Espanyol sea adjuntada a las multiplas otras ke ya se topavan aya, redaktadas en diferentes otras linguas...
La semana pasada, el mos mando el disko dvd de la seremonia de instalasyon de la dicha laja. Momentos yenos de emosyon a los kualos numerozos personajes partisiparon, entre otros Simone Weil, noble en su reminisensya de un tyempo delkual eya mizma fue una de los reskapados, komo tambyen lo fue Hayim Sefiha.
Agradesemos kon fervor i rekonosimyento muestro kerido amigo, ombre de grande valor ke konsagro su vida al esforso sin interrupsyon de no deshar despareser en el olvido una de las mas trajikas pajinas de la Historya Judia.
