Difisil vezindado para Israel ke vyene de elijir Shimon Peres komo prezidente del Estado i Barrak komo ministro de la Defensa. Dos personajes reputados por sus probidad i syempre a la bushkida de una solusyon ke salvara el puevlo Israelyano de la prekaridad.
Aunke en Israel no se trata de un sistema prezidensyal similar al de los Estados Unidos o al de la Fransya, la personalidad del ke asume esta funksyon reflekta el grado de maturita del puevlo i simboliza el prestijyo de la nasyon..
Malgrado ke en su propyo payis, el no gozo nunka de la mizma notoryedad ke el konosyo en la Evropa i en los Estados Unidos, se puede afirmar ke la influensa de Shimon Peres sera grande sovre los dirijentes aktivos.
Sezudo i en mizmo tyempo pragmatiko todo en kedando syempre un grande idealisto, luchador desde mas de 50 anyos no solo por la mantenensya de un terreno rekonkuisto despues mas de 2000 anyos de galud, ma por la paz en este pedaso de tyerra, Shimon Peres es antes de todo "ombre de dialogo" i ansi la persona la mas adekuada a toparse en este momento a la kavesera del payis.
Politiko en el senso el mas puro de la palavra, konsyente no solo de los derechos de su puevlo ma tambyen de los del partido adverso, sin por esto kaer en una induljensa beata, el sera por seguro, un konsejero para sus kompanyeros de lavoro i un pastor para su puevlo, a travers las flamas de aborresimyento ke lo entornan...
La seksyon “The Peres Center for Peace” del Ministeryo İsraelyano de los Echos Eksteryores (Dış İşleri Bakanlığı) mos da numerozos detalyos sovre la chikes i la briyante karrera administrativa i politika del muevo Prezidente. Malorozamente, por mankura de lugar, vos transmetemos solo unos kuantos de entre eyos:
En 1923: nasimyento en Polonya i onze anyos mas tadre, aliya kon sus paryentes en Israel, ande el kumplio su formasyon eskolarya en el Liseo agrikolo Ben Shemen.
En 1943: el fue nominado Sekretaryo de la Manseves del Partido Travayisto- Sionisto.
En 1947: David Ben Gurion i Levy Eshkol lo introduzyeron en las Fuersas de Defensa de la Haganah i le konfiaron la karga de la seksyon relativa a la “Mano de Ovra” (Men Power)
En 1948: Shimon Peres fue dezinyado shefe de la Marina Israelyana i a la fin de la gerra direktor de la Delegasyon del Ministeryo de la Defensa en los Estados Unidos.
En 1953: Entonses aedado de 29 anyos, el fue kargado (syempre por el Primer Ministro Ben Gurion) del posto de Direktor Jeneral del Ministeryo de la Defensa.
En 1969: Nominado ministro de Immigrasyon i Integrasyon.
En 1974: Ministro del Transporto i de la Informasyon, mandato durante el kual el punto kulminante fue la operasyon de salvasyon de Entebbe. De 1984 asta 1986 Shimon Perez fue elijido Primer Ministro del governo de Unidad Nasyonal.
En 1988: El partisipo al plano de retrato de las armadas Israelyanas del Libano, i en el Governo de Unidad Nasyonal de 1988- 1990 el servyo de muevo komo primer ministro i tambyen komo vice ministro de finansas etc... etc...
En 1994: El Premyo Nobel de la Paz le fue atribuido endjuntos kon Rabin i Arafat
Oy, es un ombre de esta dimensyon, un ombre riko de una enorme eksperyensa i de un idealizmo sin falta, ke se topa a la kavesa de Israel, entornado de kolavoradores animados de la mizma fervor patriotika i del mizmo senso umanitaryo.
Un vyejo proverbyo sefardi mos dize “kuando muncho eskurese es para amaneser”.
De vez en kuando, en las tinyevlas de muestra ansyedad, mos akontese de sentir komo una chika esperansa, todo en savyendo ke se trata de una utopia i es lo ke en este momento me afita personalmente. Por seguro, todo parese oy oskuro, la paz imposivle, el horizente serrado... ma envezes syertas sirkunstansyas ke djuzgamos irremedyavlemente negativas pueden ser parideras de solusyones pozitivas.
P.S. Un muevo Governo Palestinyano vyene de ser kreado en Sisjordania, suseptivle de ser rekonosido por Israel.
