Una mueva era parese avrirse, mueva manera de pensar, muevo kontakto kon el puevlo, mueva persepsyon de las kozas publikas, mueva organizasyon. Todo parese reelmente trokar a un ritmo vertijinozo.
Por seguro es ainda muy presto para dezir si esto va abutir a un rezultado pozitivo o negativo ...munchos faktores van a tener un rolo a djugar: “la fuersa de rezistensya de kada myembro del governo” i partikolarmente “la kapachidad de konvenser i sovre todo de entender sus interlokutores” de la parte de Sarkozy el mizmo ...
La lucha sera grande kontra los vyejos dogmas i prejuisyos de los tyempos pasados. Ke va ser la reaksyon del puevlo?.
Inkontestavlemente nada no es seguro, portanto es difisil de no sentir ke una koza mueva akontesyo, una voluntad de avyertura ke sera la primera de munchas otras . Por empesar Nicholas Sarkozy realizo una koza ke asta oy paresia ser utopika, sovre todo en tyempo de paz: “rekojer en un mizmo grupo politiko personas de konviksyones diferentes, diametralmente opozadas las unas a las otras en sus ideolojia”.
Mujeres i ombres venidos de partidos enemigosi empesaron a asentarsen al entorno de la mizma meza para lavorar endjuntos la mano en la mano...
Antes de todo kale akseptar ke Sarkozy es un ombre korajozo ke no aksepta de sakrifikar sus konviksyones al profito de la aparensya. Durante su kampanya elektoral el pronunsyo palavras impopulares ke puedian kavzar su desfecha. En el momento el mas krusyal , todo en no ignorando lo ke iva ser la reaksyon del puevlo, el utilizo palavras muy duras para kalifikar mansevos ke kada noche keman koches i atakan personas aedadas sin defensa.
El save byen ke una de las razones de este estado de kozas es la lamentavle situasyon ekonomika ande se topan estos desmazalados, ma no admete ke aktos de vandalizmo sean perpetrados.
El save igualmente ke la sola salvasyon en este kavzo, es el esforso personal de kada uno enverso si mizmo, sostenido por el ayudo indispensavle del entorno.
Ansi, una de sus prerogativas es djustamente de ofreser a estos desmamparados, la posibilidad de tener la kalifikasyon menesteroza para obtener un lavoro regolar, el kual solo les permetra de eskabuirsen de la terrivle prekaridad ande se topan aktualmente.
Es djustamente sovre estas valores ke son “ el lavoro”, “la disiplina” i “la solidaridad “ke Sarkozy bazo una grande parte de su programa
La prova es ke en este eskopo, el no ezito ni un punto a demandar ayudo al grande universitaryo sosyalisto Claude Allegre ke le prometyo su kolavorasyon. En desparte de esto, en un governo de vokasyon frankamente liberal, vemos dos grandes umanistos syempre del partido adverso: Bernard Koushner ke prekoniza el ovligo de intervenir (en ke payis ke sea) kada vez ke la populasyon se topa en estado de apreto i Martin Hirsch prezidente der la Asosyasyon karitativa Emmaus.
Nicholas Sarkozy les demando de lavorar kon el sin por esto renunsyar a sus konviksyones politikas. Ansi el kreo la posibilidad de egzistensya de un adjuntamyento de personas ideolojikamente diferentes, ma ke se esforsan de trespasar las linyas de rivalidad ke las opozan.
En desperte de una semblavle formasyon governomental, el Prezidente konsulto nombrozos pensadores i konsultantes entre los kualos tambyen syertos son de konviksyon politika otra ke la suya, komo es el kavzo de Jacques Attali.
Mi amiga Norma Anav (myembro eya mizma de la Unesco) me mando una lista de munchos otros nombres ke azen tambyen parte del anturaje serkano del prezidente. Entre eyos: Alain Mink, Max Gallo, Pierre Lellouche, Arnold Klarsfeld, ijo de Beate i Serge Klarsfeld.
Devemos tambyen adjuntar a esta lista de kolavoradores, Valerie Hoffenberg ke es reprezentante en Fransya del “American Jewish Comittee “i a la kuala Sarkozy demando de intervenir serka de esta grande Asosyasyon Djudia, afin de apoyar la Polisia Franseza en su lucha kontra los krimens rasistos. Valerie Hoffenberg sera tambyen konsultada sovre todo lo ke konserna las komunidades Djudias del mundo.
Es ke este immenso Aparato Sarkozysto, komplekso en su formasyon, va pueder syempre metrizar la diversidad de su kompozisyon?
Un paso fue echo, una idea fue no solo formulada ma realizada, ande se syente la voluntad de un lavoro en komun... i ken dize voluntad dize tambyen posibilidad.
