En tal ke una de los reprezantes de la Prensa Judeo-Espanyola de Turkiya, estuve envitada a partisipar. Naturalmente la mayoriya era kompuesta de famozos profesores, akademisyenes, eskrivanos de diversos paises, ke vinyeron para el Kongreso del 29ᆲ Avril. Komo ya lo savran los lektores, el “kolokyo” fue presedido del Konsyerto de İnogurasyon performado por Flory Jagoda i sus asistyentes, Susan Gaeta i Ramon Tasat.
29 İ 30 Avril asistimos a las konferensyas sin mankar ni a una. Komo lo disho mi kerida amiga Klara Perahya, se avlo unikamente Ladino i Espanyol. Lo djusto por lo djusto, no puedo pretender ke entendi muncho lo ke se avlo en esta idioma dicha “moderna”, seya ke difera de la muestra, o seya ke los partisipantes estavan avlando rapidamente. İ siguro ke esto me embaraso. Orozamente ke tuve syertos tekstos foto-kopyados, i los pude meldar en kaza, kon repozo. Aviya sujetos reelmente enteresantes. Ya eskrivyeron mis amigas sovre el konsyerto i el kolokyo, no vo repetar.
Durante estos 4 diyas (o noches) tuve munchas oportunidades de estar kon Flory Jagoda, lo ke me izo un plazer imenso. Mas i mas, en el restorante, izimos una emoza konversasyon, avlimos de muestros avuelos syendo ke tenemos puede ser raizes komunas, tratandose de la ancha famiya “Altaras.” (*) Lunes espartyendomos, Flory arregalo a mi i mi ijo, un filmo suyo, un D.V.D:”The Key From Spain: the Songs and Stories of Flory Jagoda.” Un presyozo suvenir, ansi ke las fotos ke mos travimos endjuntos. Aki kero rengrasyar İzzet Bana, ke me travo estas fotos espesyal, i tuvo la amabilidad de mandarmelas. Kerida Flory, espero ke un diya mos vamos a renkontrar. El mundo ne es tan grande!!...
(*) Mi Papu maternal, Nisimachi Altaras uzava a dezir a mi papa, ke despues la Ekspulsyon, munchas “Branshes” de Altaras, se dispersyeron en la İtalya, Bosnia, Gresya i el İmperyo Otomano. Yo lo sinti esto anyos, i anyos despues... C.D.
P-S- “Errato”- Ultimo No.(27) de “El Amanser”,en el kanton derecho de la oja 9 de mi artikolo “Lag Baomer”...Debasho la foto de mi marido, en la frontyera Libaneza de Rosh Hanikra, en un yerro myentres la “mise en page” se esta vyendo la inskripsyon “vista...de Safed.” Mos ekskuzamos... C.D.
TANTOS ANYOS SİN Tİ...
(A la memorya de mi madre)
Oy es el sigundo Alhad de Mayo,
Ay mas de ventisinko anyos yo,
Ke los esto pasando sin ti...
Tu no estas mas a mi lado,
Me mankan tanto tu kudyado,
Tu boz, tu riza, tu kerensya,
Esta muy fuerte tu absensya...
Oy es el diya de las madres,
Ma, nada no es komo antes,
Entonses tu no estas kon mi...
Coya DELEVİ
