La baza de esta tradision siendo hispanika, ay tambien una parte ke fue influensada de otros puevlos, espesialamente de las kulturas islamikas (turka i nortafrikana), ke bivieron kon los Sefaradis.
La tradision popular sefaradi es el espojo de los Sefaradis porke reflektan munchos aspektos de la vida kotidiena.
El kuento i la konseja es la palavra uzada por las narasiones tradisional. Estos kuentos i konsejas pasaron de jenerasyon en jenerasyon i servieron por distraksion las largas noches de invierno kuando la famiya entera i los vizinos se arekojian en una kaza.
Uno de los mas grandes karakteristikos del folklor sefaradi es el umorizmo. Los kuentos de Djoha ke son ironikos i sarkastikos fueron transmetidos oralmente de jenerasyon en jenerasyon.
Nasrettin Hodja ke bivio en la sivdad Aksehir de la Turikia en el tredjen siglo, es un peraonaje muy popular en el mundo Islamiko. Los Sefaradis tomaron este personaje de sus vizinos musulmanes i lo yamaron Djoha.
Djoha es un loko intelijente ke tiene el talente de instruir en azyendo riir. Las temas de los kuentos de Djoha son tomadas de muestra vida kotidiena i los karakteres son los karakteres ordinarios ke rankontramos kada diya: La eskola, la famiya, la kaza, la komida,el echo, el vendedor, el Haham, el Rey, la novya, la mujer, la ley, el mazal, el Dio, la muerte, la vida, las paras etc. A la fin de estos kuentos, mos konfrontamos kon una repuesta inesperada de Djoha ke mos aze riir ma mos forsa a pensar en mezmo tiempo. Djoha se amostra bovo, ma en realidad, kon su intelijensia puntuda, el, mos amostra la bovedad del ombre ordinario.
Djoha es la personifikasion de kualsiker ombre ke rankontramos kada kiya en la kaye. En vezes este ombre es bovo, en vezes intelijente. En unos kuentos el es prove,en otros riko. En vezes se enganya muy presto , ma en otras okaziones el es muy espierto. Rankontramos un Djoha onesto en unos kuentos, el mezmo Djoha es dezonesto en otros kuentos.Ansi, todas las kalitas i los defektos del ombre se topan en la figura de Djoha. Estos kuentos siendo umoristiko, sostienen tambien una lisyon de moral a la fin del kuento.
Djoha es publiko komo muestro vizino ma siendo en mezmo tiempo umoristiko i intelijente komo el komiko ke vemos en la televizion. Su vida kotidiena es una fuente de entretenimiento por la djente de su alrededor. Mezmo siendo una persona muy ordinera, a las vezes, el se enkasha en situasiones muy komplikadas. Es en estas estados ke vemos, komo kada uno de mozotros, tenemos el potansiel de pueder solvar las situasiones las mas komplikadas.
En realitad, los kuentos de Djoha son parabolas ke analizan la psikolojia del ombre. Estos kuentos son umoanistikos porke mos amostran ke los penserios i las aksiones de la persona son muy importante en su vida. Es en la simplisidad de estos kuentos ke puedemos topar sus profundidad.
En el mundo entero puedemos oyer los kuentos de Djoha, en diferentes versiones i kon diferentes detayes, ma guadrando el mezmo mesaje.
En la tradision oral sefaradi, tenemos tambien munchas dichas sovre Djoha; ‘A Djoha le kayo el bokado, disho ke es de ojo malo’; ‘A Djoha le disheron amokate, se kito la naris; ‘Djoha se fue al banyo, tuvo de kontar mil i un anyo’
Grasias al lavoro de los investigatores, oy estos kuentos endjuntos kon los otros elementos de la folklora sefaradi, fueron anrejistrados i esta kultura presioza no va ser mas olvidada i va ser transferada a las futuras jenerasiones.
