Klara PERAHYA
El mez de Mayo es a el solo un simbolo de esperansa, kon la largor de sus dias i esta ineksplikavle sensasyon de libertad ke el mos da... Todo parese ser mas ermozo en un espasyo de luz, la persona por unos kuantos minutos tyene la konviksyon kel dia de amanyana sera mijor ke el de oy, mas klaro i mas klemente.
Portanto a kada momento de la vida, muevas preguntas mos akosan ma tambyen espunta la posibilidad de muevas repuestas. A eya sola la formulasyon de una kestyon kontyene la bushkida de una solusyon.
Ansi, esta semana, un puevlo ke mos es muy serkano por su kultura, bushko su destino i lo eskojo el mizmo a la mayoridad.
En otro payis, el de muestros ermanos de sangre i de kreensa, al kual semos muy sensivles, una partida del puevlo protesto kontra su propyo kapo i le demando de demisyonar.
Es ke esto va rezolver sus problemas? Ande se topa la verdadera solusyon? En una perpetual kritika o otokritika? O byen en una relativa akseptasyon mutual, kon sus espasyos de klaredad i sus espasyos de oskuridad?
A la sigida de una enkuesta i del raporto akablante konsernando la defektuoza jestyon Israelyana durante la gerra kontra el Hesbollah en Lebanon, ke fue publikado ay de esto unos kuantos dias de la parte de la komisyon Winogradkargada de esta misyon, una enorme manifestasyon de mas de 100.000 personas fue organizada en Israel, demandando la demisyon de Olmert.
Entre diferentes otras kozas, lo ke estos manifestantes reprosharon al primer ministro es la deteryorasyon de la jestyon militarya ansi ke del servisyo de informasyon Israelyano i tambyen, partikularmente la muerte de numerozos ninyos del kampo adverso ke pedrieron la vida debasho los bombardamyentos Israelyanos.
Es una realidad ke durante este konflikto, todos yorimos al anunsyo de la muerte de inosentes. En el korason de kada uno de entre mozotros uvo la amargura de un akto irreparavle perpetrado por muestros ermanos. Ma no kale olvidar ke estos ninyos fueron metidos voluntaryamente en estas fraguas destinadas a ser bombardeadas, sovre orden de los komandantes mizmos de la armada enemiga afin de pueder eyos embiar libremente de aya proyektiles mortales kontra Israel.
En una situasyon semejante, ke puede azer el kapo de un Estado ke tyene komo primer dever i objetivo la seguridad de su propyo puevlo?
Munchas vezes me demando lo ke es el pezgo de la responsabilidad de un shefe enverso su puevlo i sovre todo lo ke es de ser, en syertas sirkunstansyas, la unika persona a pueder dezir el ultimo Si o el ultimo No.
El Prezidente ke, desde el empesijo de su mandato, deve asumir el pasado de su payis i la karga de una mueva jestyon, se topa munchas vezes solo al momento de la desizyon.
El raporto Winograd fue kruel i la manifestasyon ke el provoko muy amarga, ma en mizmo tyempo, komo lo disho un grande editoryalisto fransez, el fue la afirmasyon de la realidad de la demokrasia Israelyana.
Niguno ainda save komo se rezolvera este problema. Los dias avlaran. En todo kavzo, todo sera mas rasyonal en un espasyo de klaredad.