Dora NİYEGO29 Nisan Cumartesi akşamı, İstanbul Sefarad Kültürü Araştırma Derneği ve Cervantes Enstitüsü`nün birlikte düzenledikleri Sefarad Sempozyumu`nun, İstanbul Bilgi Üniversitesi`ndeki açılış konserine katıldık.
Alhad el 6 del mez de Mayo Sinko Bodas en el Kal Neve Şalom
Alhad el 6 del mez de mayo, desde las Dodje de medyo dia asta la Sej de la tadre, la grande Keila Neve Şalom estuvo yena de flores, de kantes i de alegria.
Fani Sinay i Ediz Mizrahi
Sibel Zonana i Viktor Hason
Leyla Çelik i Salvo Ballul
Gresi Sanje i Ofer Dahan
Gila Eskinazi i Can Saydam
aunaron sus destinos para una larga vida de amor i felisita, entornados de paryentes i amigos.
Ke sus kazas seyan syempre nidos de paz i de kerensya i sus unyones realsadas por la kerensya i el avenimyento.
Todas muestras felisitasyones a las famiyas Sinay & Mizrahi, Zonana & Hason, Çelik & Ballul, Sanje & Dahan, Eskinazi & Saydam. Ke syempre veyan bueno en sus ijas i ijos.
Prezentasyon del livro de Rafael Torel
İntitulado “Mümkündür Mucizeler”
Es en el oditorium “Amram” del “Ulus Özel Musevi Lisesi” ke Alhad, el 6 del mez de Mayo, Rafael Torel resivyo sus numerozos amigos, kumbidados para la prezentasyon de su livro, la interesante istorya de la vida de un grande ombre de aksyon tanto en el kampo sosyal ke industrial.
Rafael Torel tuvo una chikes difisil, ma grasyas a sus propyos esforsos i a la fuersa de su voluntad, el pudo alkansar a la situasyon briyante ke es la suya.
El nunka se olvido el apoyo ke resivyo de sus serkanos i de sus maestros de eskola i guadro intakta en su memorya i korason una enorme gratitud enverso la komunita a la kuala el apartyene.
Grande filantropo, el dediko una grande parte de su tyempo i de su aktividad a ayudar sus proksimos i a krear sentros de asistensya para los desdichados ke se topan en el apreto.
La seremonia empeso kon el diskorso i el desvelamyento por el Gran Rabbino Rav İsak Haleva, de una grande Plaketa de Onor?
En sigida, Yakup Barokas, Koordinador de Edisyon del Şalom, tomo la palavra i detras de el Tilda Levi, direktora de redaksyon del mizmo semanaryo, meldo una letra mandada por Silvyo Ovadya ke se topava en la imposibilidad de asistir a la seremonia.
Enfin fue el torno de Moris Levi, Koordinador del sentro de publikasyon Gözlem. El avlo sovre la grande aktividad i los proyektos para el futuro de esta institusyon i prezento las dos redaktoras del livro “Mümkündür Mucizeler” Batya Kebudi i Rita Ender.
Un muy riko “büfe” aparejado se puede dezir kon fervor por las damas de la Matan-Baseter / Barin-Yurt, realso ainda mas el prestijyo de esta tan ermoza seremonia.
