La salvasion Lazar Ruso del Kampo de, Konsantrasyon por el Konsul Turko, Behiç Erkin

Dora NİYEGO

El kinze de Avril, el diya de Shoah, partisipi a una reunyon ande Lazar Ruso (ke fue salvado de un kampo de konsantrasyon) estava envitado, para kontarmos, su  salvasion  de un kampo  de konsantrasyon, por el Konsul Turko de Paris, Behiç Erkin. Lazar Ruso, nasido en el anyo 1921, emigro a Paris kon su famiya en el anyo 1929. Kuando los Almanes entraron a la Fransya, los Parizianos empesaron a sintirsen dezrepozados, de ver soldados Almanes kaminando en las kayes de Paris. En el anyo 1941, un diya ke Lazar Ruso estava salyendo del metro en Champs Elysee, unos kuantos soldados Almanes lo aretaron, i le disheron ke keren ver su karta de identidad. Vyendo la stampa kolorada kon el biervo 'juif' estampado enriva la karta, los soldados lo tomaron a Lazar i lo dirijaron enverso un otobus, yeno de mansevos djudyos. Kuando arivaron a la Gare du Nord, los mansevos se suvyeron a  los trenos, i amedya noche, arivaron a un kampo de konsantrasyon. Lazar Ruso estuvo dos mezes en este kampo. La primera noche le dieron una manta, una tasa de agua i un numero. Kada noche se echavan en las ranzas, i no puediyan durmir pormodo de la ambiertura.. Las demanyanas les davan un kafe, las midis una supa agueyada i las noches dozyentos gramos de pan. Las noches antes de echarsen, todos los prizonyeros eran ovligados de tomar una dush, i duspues del kontrol de tinya, se echavan medyo mojados kon los mezmos vsitidos enriva. Lazar disho ke se vistyo el mezmo vistido por dos mezes sin pueder lavarlo ni una vez. 'Kada noche me sonyava de komidas' esta diyendo Lazar Ruso. 'La sola koza ke pensavamos era de pueder topar kualo de komer, por pueder kedar en vida. La esperansa de pueder kedar en vida, mos dava la fuersa de bivir’.
Un diya, un soldado Almano vino i le disho ke lo vana deshar  libro, i ke va pueder salir del kampo. Lo yevaron a una villa, ande un soldado estampo el biervo 'libro' enriva de su karta de identidad, i lo embiyaron a su kaza. Al diya, Lazar se ambezo ke su padre se fue al Konsolato Turko para pueder salvarlo.
'El Konsul Turko de Paris, Behiç Erkin, no desho ke los Nazis entren a las kazas de los djudyos Turkos, i los protejo komo sus kreaturas' esta dizyendo Lazar Ruso. 'Los Nazis embiyaron a los kampos, solo los ke puedyeron apanyar en las kayes. Ma malorozamente, el konsul reusho a salvar solo a los ke puido alkansar'.  ‘No puedemos inyegar la humanidad del konsul, i sus esfuersos por protejar los djudyos Turkos. El, no desho ke los Nazis aten la estreya amariya, a los brasos de dingun djudyo Turko. Behiç Erkin reusho a dar la Identidad Turka, a todos los djudyos ke provaron ke teniyan raizes Turkos. Kuando empeso la gerra, mezmo los ke no pagaron  la kontribusyon anyada al Konsolato Turko por munchos anyos, fueron pardonados, i fueron embiyados a la Turkiya. Munchos trenos yenos de djudyos Turkos, partieron por la Turkiya. El treno ultimo, fue embiyado en el anyo 1944. Ma malorozamente, pormodo del manko de komunikasyon, 1660 djudyos Turkos fueron embiyados a Aushwitz, i no savemos sus destinos.
Behiç Erkin es un egzamplo de humanidad, i deve de ser introduido al mundo entero, porke el mundo veyga,  ke nada no es emposivle, i kon un poko de eforso i de voluntad, se puediya  salvar munchos djudyos.