Ay de esto 65 anyos...

Jerome Socolovsky, JTA.orgMadrid (JTA). 94 yaşında ve zorlukla görebilmesine rağmen Angela Pipano, Selanik`teki çocukluk anılarını berraklıkla hatırlıyor.

Judeo-Espanyol
9 Ocak 2008 Çarşamba

Klara PERAHYA

Alhad la tadre el 15 Avril, komo kada anyo desde mas de medyo syeklo, en ke lugar del mudo ke sea, kaji todos los djudyos, los idealistos komo los materyalistos,  los kreentes komo los ateistos, los tsadikim komo los simples ombres del puevlo, kon o sin kultura relijyoza, se arrestaron de bivir sus propya vida para rememorarsen la vizyon abstrakta de una desgrasya inkomparavle a ninguna otra
Todo ya fue dicho los anyos pasados a este sujeto...  la trajedia de ombres, mujeres i ninyos kruelmente  arrankados a la vida ,inosentes  kemados sin razon... la salvajeria de un krimen  monstruozo ke nada nunka puedra justifikar ni mizmo eksplikar i enfin la yaga ke esto desho en muestro korason komo en muestra konsensya... Si, todo ya fue dicho i portanto kale de muevo dizirlo ...kale dizirlo miles i miles de vezes, sin kansarmos i sin espanto de kansar ken ke sea
Desde la Prehistorya, uvo gerras terrivles, karnajes sanglantes, ma kaji syempre de enemigo a enemigo, nunka  esta metikulozidad en la elaborasyon del krimen,  nunka semejantes delitos  fueron perpetrados en un konteksto intelektual tan refinado, despues de aver oido la Muevena Sinfonia de  Beethoven  o aver meldado una pajina de la ovra de Goethe...
El jenosidyo de los anyos 1941񮕨  fue una dezumanizasyon de la umanidad. No es solo el djudyo, ma  el umano en su integralidad, ke fue ferido a muerte ...la Shoah avyo la puerta a lo ke asta un syerto tyempo paresia ser imposivle a realizar, eya permetyo aktos de fanatizmo inumanos asta azer de sus propyos ijos  "robotes" a los kualos fue inkulkado un jenero de reflekso de Pavlov ke los pusha a achetar de destruirsen eyos mizmos  afin de destruir el objeto de sus aborresimyento...
Paradokso difisilmente eksplikavle o byen reaksyon kontra los aktos de terrorizmo ke sakuden aktualmente el mundo, en varios payizes del mundo vemos una partida de la manseves djudia atarse de mas a mas a la memorizasyon de la Shoah.
No se trata de entretener el odyo kontra un puevlo...No tenemos ningun derecho ni ninguna razon de aborreser ken ke sea por un krimen perpetrado por sus jenitores o predesesores , kada uno deve pagar unikamente por sus propyas faltas.
Ma tambye no kale olvidar ...antes de todo por respekto enverso todos los ke fueron  las viktimas direktas de este terrivle kataklizmo... No kale olvidar porke de muevo, en otras sirkunstansas , debasho otros pretekstos i de una manera diferente,  a interval de mas a mas estrecho, aktos similares se produzen oy en dia, en diferentes partes del mundo...
No devemos olvidar porke mas pasa el tyempo, mas semos testigos  de una banalizasyon del krimen i de la sufriensa ke el desha en pasando ...de mas a mas se ve una degradasyon de la konsensya umana, el oportunizmo, el enkorvamyento delantre las valores materyales, un mizma indiferensya del ombre enverso el ombre..
Una kestyon mos vyene al tino: “Es ke,un dia en el avenir vamos pueder perdonar la Shoah?"  La respuesta es difisil. Komo no se puede kulpabilizar los desendyentes de los kriminales ke eyos no kometyeron ningun delito, no se trata tambyen de perdonar los kriminales si no ay arrepentimyento..
A este sujeto kero sitar un paragrafo de una eskrita de “Deborah Lynn  Danon” a propozito del livro “The Sunflower” de Simon Wiesenthal ke eya tuvo la oportunidad de analizar::
“Jewish law stipulates one who sins must repent through a process of tshuva.Additionally, a Jew can only forgive sins perpetrated aigainst himself,not thos commited against others”. (La ley Judia  estipula ke una persona ke peka deve repintirse mezo la Teshuva. Eya estipula tambyen ke un Judyo puede perdonar solo los delitos perpetrados kontre el mizmo, ma no los ke fueron echos kontra los otros).