‘Kualo les va dar a komer esta noche?’. Esto era el mas grande problema del diya. Las demanyanas, antes ke se esperten los ijos i el marido, kaliya aparejar las komidas i inchir los sefertasis. La komida de kaza es la mas limpya i la mas sana. No aviya komer afuera akeyos diyas.
El tiempo de muestras madres no era komo oy, ke tenemos todas las fasilidades de la teknolojiya. Kada demanyana viniya el sudju i se inchiya la tinaja kon agua buena. Los alhades, muestros padres se ivan a Çirçir u Hünkar para trayer agua savroza a kaza.
Munchos anyos antes, el tel dolap (almaryo de ilo) tomava el lugar de la frijider i se metiya en un lugar mas fresko, para ke las komidas turen mas muncho.
En las paredes de la kuzina, aviya tavlados ande se metiya chinis, kalderas, kavanozes yenos de dulses diferentes (echos de kaza), i turshis asentados en enverano. El molino de karne, el tripito, el rayo, el batidor de guevos (a mano), todo kale ke este debasho de la mano porke se empleyavan kada punto.
El fregado se aziya kon agua kayente, kon un shavon i un fregon. Duspues ke el fregado eskuryo en el tavlero, todo se pasava de la agua yelada, se enshuguava kon un kanyamazo blanko i se metiya al lugar.
Una ija ke vino a la edad de kazar, antes de todo, kaliya ke saviera gizar i kaliya ke siera kapache en los echos de kaza. Ermozura, saverisyo, rikeza no teniyan muncha emportansia si no era eya talente en la kuzina.
Borekas, boyos, bulemas, biskochos, masapan de kaza (en Pesah), albondigas de prasa, likorino, garato, dolmas de kalavasa, de pipirushka, de tomat, de kol i de espinaka, todas estas komidas ke tomavan buen kadar de tiempo, se gizavan kada nada.
Noche de shabat se komiya gaya kon avramila. Komer lentejas los diyas de lunes i de djugueves era defendido porke son diyas de Sefer. El komposto ke se komiya kada noche duspues de estas komidas pezgadas, ayudava a dijerar. Si no se dijero esto todo, el sitlich i el limon buyido kon nane era la mijor milizina. El problema de kolesterol no egzistiya akeyos diyas. El kodrero, las kostiyas de karne, el meyoyo i el igado no mankavan de las mezas. Komida sin karne no se gizava akeyos diyas. Diziyan ke laa agua de karne dasavor a las komidas.
Komo no aviya ornos en las kazas, todas las komidas de orno se embiyavan al ornero. Ken pensava a la tansiyon, a la asukar o al kolesterol? Los komplimentos ke resiviya la mujer de su marido ya valiya esta toda pena.
Estos uzos i kostumbres de la kuzina de la mujer djudiya pasaron de jenerasyon en jenerasyon. Oy, komo munchas mujeres tienen karyeras i estan lavorando afuera de kaza, todos estos uzos trokaron. La teknolojiya trusho munchas fasilidades al pie de la mujer. Ma los kostumbres de las fiestas no trokaron. En Pesah i en Roshashana, mezmo las mujeres las mas okupadas, estan entrando a la kuzina de la demanyana i estan pasando munchas oras aya para azer aparejos, porke tienen de resivir la famiya entera a komer. No puedemos dizir ke estan muy kontente de esto, ma estan azyendo sus puederes para transferar las reglas del djudaizmo a sus kreaturas.
