El bayle en los uzos i kostumbres ebraikos

A ke momento estos djestos fueron koordinados i devinyeron “lenguaje”?
A este propozito konsulti la Judaica para bushkar kual  era, en la Biblia el rolo del bayle, integralmente kompuesto de djestos ma kaji syempre sinyifikante:
Es desde la antiguidad ke el bayle era konsiderado en el judaizmo komo la ekspresyon de la alegria i del entuzyazmo relijyozo. “Ay un tyempo para el limunyo i un tyempo para el bayle” disho el eklezyasto (3:1,4).
I tambyen, kuando el poeta deskrivyo la destruisyon del grande Templo, el se lamento”La Alegria de muestro korason se akavo, i muestro bayle troko en limunyo. (Lam. 5.15).
Los bayles ke selebravan las viktoryas militaryas eran por la mas parte egzekutidos por mujeres. Ansi despues del pasaje de la mar kolorada, la profetesa Miryam, ermana de Aaron, su pandero en la mano, empeso a baylar endjuntos kon sus kompanyeras.
En la liturjia Djudia el bayle ekspresa prinsipalmente la alegria i sovre todo  la fervor... A ningun momento el no tuvo un karakter erotiko ni makabro... nunka el no trespaso los limites de la desensya i mizmo, kuando el Rey David, despues de aver vensido el enemigo, se metyo a baylar al entorno del altar kon una frenezia desbordante, el fue kritikado de la parte de su propya djente
Los kabalistos de la sivdad de Safed ivan sovre los montes de la Galilea para resivir el Shabat kon  psalmos i bayles... i ainda munchos hassidim azen lo mizmo en kualkyer otro espasyo.
Segun el livro de Samuel los primeros profetas tomavan kaji syempre kon eyos sus instrumentos de muzika i empesavan a baylar antes de profetizar. La fuerte djestikulasyon fizika ansi ke la ardor de sus sentimyentos los metian en un estado de  egzaltasyon i ansi de nevua.
El bayle no es ni  fue nunka una djestikulasyon vazia de senso, eya  muchas vezes en su manifestasyon espontanea, trespasa la palavra  “Alava el Sinyor al sonido de las trompetas, kon vuestras arpas, vuestros kantes i vuestros bayles”.
En ke relijyon ke sea, i munchas vezes mizmo en la vida koryente, el bayle integralmente kompuesto de djestos ma kaji syempre sinyifikante es muncho mas ke un simple pasatyempo.
Me akodro aver meldado ke kuando la grande bayladera İzidora Duncan avia pedrido sus dos ninyas en un aksidente, eya no pudo ekspresar  su dolor ke solo kon el bayle...
En esta semana de Pessah, sovrepasaremos muestras preokupasyones, baylaremos en muestro korason afin ke todo sea luz, amistad i unyon.