Ma en un periodo ke se deve konsiderar istoriko, del 15 asta el 22 Marso 2007, 24 miembros de LK viniendo de kuatro paises mos enkontrimos i estuvimos en djuntos en Israel, viajimos lugares ermozos i emportantes en el pais, konosimos unos 70 miembros mas de LK ke biven en Israel, i durante tres dias en Yam Amelah (La Mar Muerta) estuvimos kon syenes de otros Ladino-avlantes mas.
Todo fue emosionante i inolvidable para mozotros, kon un program yeno kada dia, i mos izimos komo una famiya de amigos ke van a ser para muestras vidas. Entre muestros "highlights" (altas luzes?!) devemos sitar el primer noche de Shabat en el otel Metropolitan de Tel-Aviv, djuntos kon sinko amigos de Israel - Israel Bar Yehuda, Yehuda i Rahel Hatsvi, i Selim i Katia Amado. Yehuda mos kanto un kiddush maraviozo al uzo muestro, i Israel mos meldo dos poezias ermozas kompozadas despues de komer sintir unas poesias komposadas de Israel. Al noche de Alhad (salidura de Shabat) el 17 Marso tuvimos la grande reunion en el salon Akmen del "Turkiyeliler Birligi" (Union de Turkanos en Israel) kon miembros i amigos Israelianos de Ladinokomunita, i la partisipasion del Sr. Yitshak Navon (presidente de la Autoridad de Ladino en Israel i sinken Presidente del estado de Israel) i el Sr. Moshe Shaul (vispresidente de la Autoridad, editor de Aki Yerushalayim), Matilda Koen Sarano, Aaron Cohen (direktor de la Autoridad), el profesor Shmuel Refael de Bar Ilan, i munchos mas. Uvo muzika (de Moshe Habiri i de muestra Daisy Alalouf Newell) i delikatesa sefaradis a komer, i konklusion kon el kantar la Hatikva (imno nasional de Israel.)
Pasimos tres dias yeno de muzika i avlas en Ladino en los "Dias de Leche i Miel" ayi, i vijitimos munchos lugares komo Masada i Kumran, i el Knesset de Yerushalayim, viajando siempre en un otobus grande i un giya a muestra dispozision. Alientro del otobus izimos lotarias para arekojer paras para "las arvoles", ke es muestro buto de ensembrar un boske al nombre de Ladinokomunita en el Galil (Israel). En Yerushalayim, la ultima noche La Autoridad de Ladino mos metio el punto a este maraviozo periodo, kon una envitasion a muestra onor en "Bet Belgia" de la Universidad Ebrea de Yerushalayim, ke fue una reunion elegante i amistoza kon los dirijadores i miembros de la Autoridad, i mas miembros Israelianos de Ladinokomunita, kumidas delisiozas, i muzika sefaradi de Betty Klein, ke akompanyo tanbien al kantar de una kantika de la kual vos eskrivo otra ora. Tuvimos el plazer al ultimo dia, despues ke algunos ya avian partido, de tener la vijita en el otel de otro amigo de LK ke no pudo vinir a los otros enkontros, el Sr. Joseph Calderon i su espoza Mazal.
El resultado de esto todo fue ke agora tenemos un atajido fuerte i una amistad espesial entre mozotros los ke asistieron a este el Primer Enkontro Enternasional de Ladinokomunita. Konosemos no solo los nombres ma tanbien las vistas, los karakteres, muncho de los pasados i los talentos de todos, komo si fueramos ermanos. Esperamos ke este renkontro va tener munchos ermanos en los anyos venideros, kon munchos mas partisipantes.
