La semana pasada muryo el Dr. Marko Benbanaste i kon el es uno de los de alkavo testigos de los tyempos pasados ke desparese.
Kon su ancha kultura, su elokuensa , su fiziko asta la fin atraktivo, i sovre todo su avyertura a la aktualidad i a la mueva evolusyon de la sensya, el inkarnava el prototipo del ombre kumplido, profundo en su pensamyento i tambyen kudyadozo de su aspekto eksteryor.
Profesor de universidad i shirujyano el dava muncho importansa al estudyo i al adelantamyento kultural de la manseves, lo ke lo pusho a ayudar munchos jovenes en sus desvelopamyento intelektual.
El mizmo en su manseves, poko despues de aver obtenido su diploma de dentisto, avia tenido el koraje i la enerjia de meterse de muevo al lavoro para obtener su titolo de Dr. shirujyano.
A sus ijos i keridos muestras sinseras kondoleensyas i la ekspresyon de muestra profunda simpatia.
