Dora NİYEGO
Unos kuantos diyas antes de Pesah, en un kampo de lavoro en Sibirya, unos kuantos prizonieros se desidaron de selebrar la fiesta. Micheal Stravinsky fue eskojido komo reprezantane para demandar arina del ofisiero Ruso, para azer matsa.
Mezmo ke saviyan ke puediyan ser punidos, los prizonieros kijeron alkansar la sovar de komer matsa, la mezma noche kon todos los djudyos en el mundoentero.
Michael estava emprizonado por dar a Israel los sekretos de la Rusia i deviya de pasar ventisinko anyos en este kampo de lavoro forsado.
El korason en la boka, Michael se dirijo verso el edifisyo de la administrasyon. Batyo la puerta. El ofisiero daryento, le dyo un papel, dizyendo ke, su demanda de arina fue akseptada. ‘Vos vamos a dar bastante tejas para konstruir un orno’ le disho el ofisiero. ‘.Si reushish a eskapar el orno fin Pesah, vaja pueder azer matsa . El montante de arina ke vos vamos a dar, va ser aminguado de vuestras komidas de siete diyas’.
Presto, los prizonieros empesaron a konstruir el orno del espanto ke no troken de idea. Todos los prizonieros djudios del kampo, empesaron a ayudarles kon grande ardor i kon la alegriya de pensar ke ivan a pueder komer matsa. Esta iva ser la primera selebrasyon de Pesah en esta prizyon. Mezmo ke estas matsas kemadas i deformadas no paresiyan a las matsas ke resivian de Israel, por los prizonieros, estas matsas teniyan la savor de libertad.
Noche de Pesah, metyeron una tavla grande embasho i todos se asentaron enriva de las mantas al derredor de la meza. No teniyan ni haroset, ni guevo, ni guesso tostado, ni maror: solo una kacherola de patatas ke un prizoniero aviya guadrado de la komida de midi. El Seder ya estava pronto. Michael empeso a dizir la Agada. Lagrimas estavan koryendo de sus ojos. ‘MAH NISHTANA HALAILA HAZEH MIKOL HALEILOT’. ‘Deke es esta noche diferente de las otras noches?.’Michael ya savia deke esta noche era diferente. El, nunka, en su vida entera, no si iva olvidar de esta noche. Los otros prizonieros, temblando en el areskuro, al derredor de este Seder simboliko, se estavan kreyendo, ke el Dio los salvo i les dyo la libertad atras.
Esta memoria mos esta amostrando, una vez otra, la sinyifikasyon de Pesah. Presah es la fiesta de libertad. En selebrando esta fiesta i komyendo matsa, mos unifikamos kon todos los djudyos en el mundo, mezmo kon los djudyos de antes miles de anyos, akodrandomos komo el Dio los salvo de los Ejipsyanos i de ser esklavos
Komo en esta memoria, mezmo en los momentos los mas perikolozos, dingunos no puido amatar la kandela del djudaizmo en el korason del djudyo.
Komo kada anyo, i este anyo la Agada ke se dizimos todos, noche de Pesah,va kontinuar a survivar la flama del djudaismo en el korason de kada djudyo, i esta noche, mos va azer sintir atados kon todos los djudyos en el mundo entero. entero.
