Una vez mas se konfirmo los derechos de la mujer ansi ke su “egualidad kon el ombre” i su revendikasyon de partisipar no solo a su lado ma “lado kon lado” kon el, a la rezolusyon de diferentes problemas tanto en el kampo familyal ke sosyo-politiko...
La valor del djuzgamyento feminino es oy en dia rekonosida asta azer de eya la konkorente valavle del ombre sovre terrenos ke le eran serrados, lo ke le permete el akseso a profesyones rezervadas asta agora kaji unikamente a la klasa maskulina.
La lucha fue larga i muy dura ma de una urjensya imperyoza. Sus viktoryas konsekutivas en syertas partes del universo son no solo el triumfo de los derechos femininos ma tambyen de los derechos umanos en sus totalidad, derecho del ke nasyo prove, bruno o preto, derecho para todos, de ke orijen ke sean, de pueder ayegar asta la klasa dirijente en vertud unikamente de sus esforsos i meritos.
Si, grandes progresos fuerons a este sujeto realizados en los payizes verdaderamente demokratikos ma sin por esto ainda ayegar a su punto definitivo.
Oy, en la plenitud de su libertad, es para la mujer el momento no solo de “pueder” ma igualmente de “saver” dezir “Si” o “No” a syertas kozas i de asumir en su totalidad el pezgo de sus desizyones..
Ken dize “triumfo” dize tambyen “dever”; la egalidad de derechos no es solo una “ganansya” ma en mizmo tyempo una karga. Eya implika syempre una responsabilidad... A kada momento, todo puede ser de muevo metido en kestyon , envezes dolorozamente... a kada momente, avra por seguro una koza a la kuala la mujer devra renunsyar... lo mas importante para eya es de nunka traisar su feminidad.
Despues de un largo kombate, la viktorya nesesita un esforso sin interrumpsyon de maturidad. Afin de pueder mentenerla , eya egzije el menester imperyozo de dever azer mas ke los otros i de no permeterse la mas chika neglijensya...
La mujer moderna tyene de asumir un dopyo rolo. El primer ke desde milenaryos le es propyo, koforme a su kondisyon de mujer, a su morfolojia i sus funksyones fizikas ansi ke a su psishizmo i su sensibilidad de madre... el segundo la afirmasyon lejitima de su “yo” al kual sus fuersas vitales la pushan .
Avra momentos ande el sentimyento maternal sera el mas fuerte, kon su immenso potensyal de kerensya i su engajamyento voluntaryamente asumido, lo ke es por seguro lo djusto. Es a kada mujer ke kaye la karga de topar un punto de ekilibro. “Renunsyar personalmente a syertas kozas sin nunka sakrifikar kualo ke sea”... “renovelar sin nada renyegar”... “fraguar sin nunka destruir “
Un largo kamino aspera ainda la mujer moderna, un kamino empyedregado, rezikozo, yeno de entrepresos ma eya savra trespasarlos... ay en eya una flama ke nunka nada puedra amatar: “el razonamyento” intimamente unido a “la sensivilidad”.
