La fiesta de Purim es selebrada kon la famiya entera, chikos i grandes, sin apartar, todos endjuntos. Por komemorar los evenementes mirakulozos, meldamos la Megilla de Esther, noche de Purim i al diya. Kuando el nombre de Haman es mensionado, batimos los piezes embasho por ekspulsar el diyavolo.
En Purim, amostramos la emportansa de la union del Judaismo i de la amistad entre la famiya i los amigos, embiyando regalos de dulses a muestros keridos. La mas grande mitzva en Purim es de akodrarmos de los proves.
Komo en todas las fiestas, selebramos el Purim aparejando un grande pranso kon la famiya entera i los amigos por alegrarmos en este diya bindicho.
Por komemorar el diya de orasyon i de tanid ke los djudyos pasaron antes de esta viktorya, azemos tanid (lo mas las ke se yaman Esther) el diya antes de Purim, ampesando tres oras antes el amaneser i kortando el tanid kuarenta puntos duspues de la fin del diya.
Si el diya antes de Purim kaye en un Shabbat, azemos tanid dos diyas antes, el diya de djugueves.
Por komemorar el medyo shekel ke kada djudyo dava en el tiempo de Bedamigdash, es uzo de dar unos kuantos groshes a los proves por ayuda. Segun esta kostumbre, esta mitzva kale ke seyga akomplida el diya de tanid.
La noche de Purim, la demanyanada i la tadre, se melda la orasyon de Al Ha Nissim, a boz basha.
En la Megilla de Esther, ay una seksyon ke dize ke kale bever vino i kale emborrachar fin ke no se pueda mas entender la diferensia entre las palavras ‘Haman es maldizido’ i ‘Mordehay es santo’.
Es defendido por las mujeres de emborracharsen. Eyas kale ke aparejen el pranso de Purim i kale ke se alegren kon sus famiyas.
El pranso de apaurim kale ke se aga de diya i no de noche porke la Megilla dize ‘Diya de fiesta i de alegriya’.
Purim alegre al mundo de djudaizmo i ayegados para kada anyo.
